KTV Bar sa North Recla

Isakripisyo ang kooperasyon alang sa seguridad tali sa Pilipinas ug sa Estados Unidos tungod lang sa usa ka bayot nga gipatay og sundalong Amerikano?

Nakapangutana ko niini tungod sa petisyon nilang kanhi senador Rene Saguisag ug Wigberto Tañada batok sa Enhanced Defense Cooperation Agreement (EDCA) tali sa US ug Pilipinas. Tungod sa hulhog sa mga militante ug aktibista, misakay sa petisyon ang pamilya ni Jeffrey Laude, kadtong bayot nga gipatay sa usa ka US Marines sulod sa motel.

Ang maayo g’yud unta niini, ipaubos sa survey ang maong kasabutan aron mahibaw-an kun uyon ba o dili ang mga Pilipino sa EDCA. Kay nagtuo ko nga pipila ra gyud kining mga walhon nga dili gusto sa mga Amerikano, samtang kinabag-an sa mga Pilipino uyon nga aduna kita’y security agreement sa US tungod sa sagunson nga panaugdaog sa China kanato’ng mga Pilipino.

Kun nakig-abin sa US ang Japan sa kahadlok nga mubangon ang higanteng China aron tumban kita sa Asya, kita sa Pilipinas magpabiya na hinuon sa US?

Nahadlok ko nga kun ingon ka “OA” (overacting) silang Saguisag, Tañada ug ang mga walhong aktibista nga pro-China, mabugnaw ang US pagtabang kanato.

Karong bag-o, adunay international think tank nga miingong duha ka isla sa Spratlys nga giokupar sa Pilipinas dili kuno ato kun dili iya sa Vietnam. Nagduda ko nga sugod na kini sa pagkabugnaw sa US pagtabang tungod sa kadaghang Pilipino nga “OA” kaayo, pun-an pa sa kiat sa usa ka bayot nga gusto pang ilambigit ang nasud sa ilang kayabag.

Hunahunaon unta pag-ayo nilang Saguisag, Tañada ug sa mga aktibista unsay mahitabo sa Pilipinas kun wala’y suporta sa seguridad gikan sa US?

* * *

Napungot kong nagbasa sa balita nga ang Las Vegas KTV bar nga gipasirad-an sa City Hall kay bastos kaayo og show sa mga babaye nagbukas og balik, ug mao gihapon ang pasundayag.

Balita nako nga adunay “koneksiyon” sa City Hall ug sa mga polis ang Insik nga tag-iya sa bag-ong East Paris KTV Bar. Akong hagiton ang mga women’s group o CCAIB sa pagpasaka og kaso sa tag-iya niini ginamit ang mga ebidensiya nga nakuha sa mga opisyal sa City Hall nga mipasira niini.

Tinuod ba kaha ang report nga ang ngalan nga narelesan og business permit sa City Hall “dummy” lang kini?

Maayong susihon usab ang report nga adunay mga polis ug opisyal sa City Hall nga magpirmehan sa maong bar.