Mga tambal sa palibot

Mga tambal kini nga natural o gikan sa kinaiyahan. Mga tanom nga atong makita diha sa tugkaran o sa palibot. Gihagpat nato kining kasayuran sa pamaagi sa paggamit niini segun sa nabasahan nato sa nagkalainlaing basahon. Daghan nang natambalan niini nga epektibo usab sumala sa mga pagdukiduki.

Tungod niini, kun may mamatikdan kita nga lain ang gipamati sa lawas, maayong modangop dayon kita sa pagtambal niini pinaagi sa paggamit sa mga tanom. Kay sa paaboton pa nato mo-grabe o mokomplikar na hinuon. Kay lagi nahadlok o nangiyawat kay wala gikasarang nga ibayad sa tambal ug doktor.

Dili  sab nato mabasol ang uban kay maglisod lagi sa pag-ila aning mga tanoma. Unya, nihit sad ning makita ilabi na sa dakbayan. Pangitaon kaayo kun ato nang kinahanglanon.

Ang sulbad niini, magpakisayud sa agrikultura sa city hall o munisipyo sa inyong dapit, kun unsay gipangita mong tanom. Unya kun kaila kana sa maong mga tanom ug ang iyang kapuslanan, ayaw kalimot:

1. Mopili ka lang og usa ka tanom nga maoy gamiton mo sa usa ka sakit. Seguroa lang ihalas kini nga dili inabunohan sa kemikals. 2- Kinahanglan nga hugasan pag-ayo sa dili pa itapal o pabukalan o lagaon. 3. Human mahiwa o mahugasi ang tanom nga itambal, mas maayong maoy gamita ang porselana o kolon (ceramics) sa pagpabukal. Mahimo sad ang stainless, kanang igo lang gamiton sa usa ka adlaw. 4. Obserbahe ang pasyente kun may tilimad-on bang agi-allergy, undangi na lang.

Kun wa mohiyos ang hubag o ang impeksyons niini, kay grabe natingali nga dili na madala’g tambal pinaagi sa tanom, iadto na lang dayon sa klinika sa doktor.