Nasaag nga kongreso

Sa milabay’ng pipila ka buwan, nahimo’ng busy ang kongreso ilabi na gayud ang senado tungod sa daghang imbestigasyon nga ilang gihimo kabahin sa giingong anomaliya nga gikalambigitan sa mga tag-as nga opisyal sa gobiyerno.

Tungod sa ilang kaikag sa pag-imbestigar, akong naobserbahan nga nakalimtan na hinuon sa mga senador ug kongresista ang ilang trabaho nga mao ang pagpanday og balaud nga mapahimuslan sa tanan.

Kay mas daghan man ang motan-aw sa telebisyon kun sila mag-imbestigar kay sa maglalis sa kaayohan sa balaud nga gipanday, gikaryer na sa mga magbabalaud ang pag-imbestigar kay sa pagpanday og balaud.

Samtang kabahin sa gahum sa mga magbabalaud ang pag-imbestigar aron magamit nila sa pagpanday og balaod, ang maong gahum giabuso na nila ug gihimo na nila’ng sakyanan sa pagkab-ot sa ilang tagsa-tagsa ka mga laraw.

Maayo unta kun ang ilang gihimo mobunga og mga kaayohan kay ato sila’ng abibahan apan sigun sa atong nakita murag dili kay daw sama na sila sa nabutaan sa ilang mga gitagoang laraw.

Angayang ilang hinumdoman nga sila mga magbabalaud ug dili mga polis, nga sila gipili sa katawhan aron magpanday og balaud nga makahatag og kaayohan sa tanan o ba kaha sa kinabag-an nga katawhan ug dili nila ibuhos ang ilang oras sa pag-imbestigar.

Kun ugaling mopadayon man sila sa ilang gihimo mas maayo pa nga mamiya sila sa ilang pagka magbabalaud ug mobalhin sa kuwerpo sa kapolisan kay mura’g sa nahisgotang organisasyon sila angayan.