Paid ads ni Binay mikatap

Kun maminaw ka sa mga ilado’ng sibyaanan dinhi sa Sugbo, ug tingali didto usab sa ubang mga dagko’ng dakbayan sa nasud, mabati nimo ang sagunson nga “paid advertisement” para ni Vice President Jejomar Binay.

Tingog ni Binay ang imong mabati nga nagpasabot ngano nga dili siya moatubang sa mga senador nga sakop sa Senate Blue Ribbon Committee. Apan tan-aw nako walay epek ang mao nga paid advertisements.

Natural, dawaton g’yud sa mga radio stations ang paid advertisements kay dugang kini nga kita apan ang mga tawo gipul-an na nga naminaw sa iyang pagpasabot nga maisip nga “simple alibi.”

Bisan ako, gipul-an sa pagpaminaw. Siya man gud si Binay ang miingon kaniadto nga dili siya moatubang sa subcommittee nga nag-imbestigar mahitungod sa giingong anomaliya nga naglambigit kaniya kay iyang gusto nga adto siya moatubang sa Senate Blue Ribbon Committee.

Diha nga giimbitar na si Binay sa Senate Blue Ribbon Committee, wala man gihapon moatubang ug hinuon, mianhi sa Sugbo sa walay kapuslanan nga kalihukan. Nagkapoy-kapoy lang kadto nako pagkuyog-kuyog gikan sa Senior Citizens Park paingon sa Barangay Pasil, ngadto sa Barangay Suba ug sa Taboan market.

Wala man hinuon ko sugoa ni Binay nga bantayan kun unsay iyang gihimo apan nagpaabot unta ko nga ang bise presidente magpa-interview o kaha mohatag og pamahayag sa giandam nga sound system didto sa Taboan Market.

Apan gibiyaan lang ang katawhan, apil kami nga media. Unya “boodle fight” kuno apan mihimo lang og pipila ka hungit ug tan-aw niya nga nakuhaan na siya’g footage sa cameramen sa television, midali’g misibat.

Atong klarohon nga si Binay maoy nanghagit og debate kang Senador Antonio Trillanes kay nagtuo tingali ang bise presidente nga mahadlok kaniya ang pangulo sa Magdalo.

Kay gidawat man ni Trillanes ang hagit, mibalibad na ‘sab kay kuno mahadlok siya nga ingnon unya sa katawhan nga gidaug-daog niya ang senador kay sigurado nga lupig kini sa debate.

Pastilan, mao na ang giingon sa mga estambay sa bukid “Don’t segorize the man under the mango tree.” He! He! He! Angayan pa ba nga tuohan si Binay? Para nako dili na g’yud.

Ang katawhan naghinam-hinam na g’yud unta nga maminaw kang Binay nga manubag sa mga pangutana nga naglambigit kaniya. Angay nga siya si Binay ang direkta nga motubag sa mga pamasangil sa kanhi niya bise mayor sa Makati.

Gikan sa isyu sa “overpricing” pagpatukod sa Makati City Parking building, ang giingong pagpanag-iya ug hacienda sa Rosario, Batangas ug daghan pa.