Editoryal - OFWs sa West Africa maoy luoy

Agwanta una og gamay sud sa 21 ka adlaw ang mga pamilya sa 108 ka mga Filipino UN Peacekeepers gikan sa Liberia. Usa sa mga nasud nga naapektahan sa Ebola Virus.

Gituyo  sa Department of Health ug sa Armed Forces of the Philippines nga i-kuwarantina ang maong mga sundalo sa Caballo Island sa Cavite aron masiguro nga dili makasulod dinhi ang maong makamatay nga virus.

Kagahapon, usa sa mga sundalo ang gihilantan, gitakigan ug dunay mga body malaise sa iyang lawas hinungdan nga gibutang dayon siya sa isolation tent sa Caballo Island.  Gipaubos na siya dayon sa Ebola test sa mga sakop sa DOH.

Si Acting DOH Secretary Janette Garin mipasalig nga Ebola free pa gihapon ang Pilipinas hangtud karon ug walay angay ikabalaka, nasayran usab nga duna kaniadto sakit nga malaria  ang maong sundalo ug gituohang mibalik ang maong sakit.

Apan kung ang mga sundalo kinahanglang ipaubos sa 21 ka adlaw nga quarantine aron di sila makapanakod sa uban kung carrier na sila sa virus,  wala mahimuot niini ang mga overseas Filipino workers gikan sa West Africa nga nabalakang pugson sa pagpapauli dinhi.

Dunay kapasikaran ang ilang kabalaka, kay kung ibutang sa crisis alert level 3 ang mga employers nila mapugos pagpapauli kanila ug sila maoy mogastos sa pletihan, posibleng di na sila i-hire pagbalik sa ilang employers tungod sa posibilidad nga duna nasay susamang krisis.

Sa crisis alert level 4, pinugsanay na ang pagpapauli kanila ug ang gobiyerno na maoy mangita og paagi aron sila makabalik sa Pilipinas.

Dili parehas sa mga sundalo, kining mga OFWs mga sibilyan sila nga nanimpalad sa maong mga nasud kay way katrabahoan dinhi, kun sila pugson pagpapauli dinhi , wala na usab silay mga trabaho.