Huyang nga intelligence

Mas maayo siguro nga lahugayon pag-ayo sa Cebu City Police Office ang sistema niini sa intelligence gathering. Kini aron usab nga malikayan ang bulilyaso sa mga sakop niini sa ilang imbestigasyon sa mga kaso.

Usa sa mga sanglitanan mao ang dakong palpak sa kapolisan sa ilang pagsusi sa nakalabay’ng mga pagpanulis dinhi sa dakbayan. Sa maong mga pagpanulis, usa ka polis didto sa Mindanao ang ilang gitumbok nga nag-unang suspetsado.

Ang ngalan ni PO3 Eugene Salingay mao kanunay ang  motumaw matag susi sa kapolisan sa pagpanulis sa mga establisemento sa dakbayan. Apan naunsa bang disgrasyaha nga dako man diay nga piniriso si Salingay didto sa Mindanao.

Matud pa sa taho, atoa karon nagtingkagol si Salingay didto sa Misamis Occidental Provincial Reformatory Jail. Kini sukad pa kaniadtong Septiyembre  human kini nadakpan didto sa dakbayan sa Danao dinhi sa Sugbo gumikan sa pagpanulis.

Gani aduna pay litrato nga migawas sa The Freeman nga nagpakita ni Salingay sulod sa Oroquieta Police Station. Ug kini nagpakita usab lamang nga piniriso gayud ang maong pulis. Apan nganong siya na man hinuon ang natumbok nga responsable sa mga pagpanulis dinhi sa dakbayan sa Sugbo? Asang aspetoha sa ilang imbestigasyon nasayop ang kapolisan ning dakbayan?

Sa akong pangagpas, anaa ang problema sa intelligence gathering sa atong kapolisan. Kini tungod kay wala  gayud nila madiskitahi nga ang ilang suspek dako diay nga piniriso didto sa Mindanao.

Sa kahuyang sa ilang intelligence, migawas nga kataw-anan na hinuon ang atong kapolisan dinhi. Ug dako gayud kini nga mantsa sa ilang imbestigasyon kun si kinsa gayud kining mga tulisan nga nanghasi dinhi sa dakbayan.

Kinsa ba gayud ang nagpaluyo sa mga pagpanulis ning dakbayan? Kini maoy dakong tanghaga karon. Siguradong dili gayud si Salingay gumikan kay tua man kini sa puthaw'ng halwa didto sa Misamis Occidental.

Ug balik na usab sa unang ang-ang ang kapolisan sa ilang mga pakisusi sa mga pagpanulis dinhi sa dakbayan. Kun kinsa karon ang ilang gi-target, ila kana karong problema. Apan basin kun palpak na usab kining ilang imbestigasyon. Nan, samot na gayud nga kataw-anan.