Pildehon si Binay?

Mura’g mao kini ang intensyon karon sa mga senador nga padayong  nagtinguha nga patubagon g’yud si Bise Presidente Jejomar Binay sa mga akusasyon batok kaniya.

Kini gawas sa tinguha nga tugkaron unsa ka tinuod nga adunay nakurakot nga kuwarta si Binay gikan sa mga dagko’ng proyekto sa Makati hangtud na sa pagpatukod og matud pa dako ug lapad nga hacienda.

Apan human sa pipila ka semana, daw wala madutli si Binay. Mas taas gihapon ang iyang approval rating itandi sa presidente. Ug labaw pa nga mas taas ang nipabor niya itandi sa gihugon-hugon nga moatbang niya nga si DILG Secretary Mar Roxas.

Alang ni Binay, siya gihapon ang nagkontrolar sa duwa. Unsay rason nga malisang siya?

Wa’ siya’y kalisangan sa pagkakaron tungod kay tan-awon ang mga survey result, siya lang gihapon ang labing gipaboran alang sa pagka-presidente sa 2016 elections.

Ug kun magsige ang imbestigasyon batok niya, nga karon napamatud-an nga wa’ makatarug sa iyang puwesto, nganong moatubang pa man si Binay sa senado?

Ang rason ngano’ng ‘way epek’ ang mga imbestigasyon ni Binay sa senado tungod kay alang sa mga botante, bulingon ang tanang mga politiko ug susama ra ang ilang taras.

Ug kun susama ang ilang batasan, kinsa pa may motuo nilang Senador Trillanes, Cayetano ug Pimentel?

Kun suwerte ang mahimo’ng sukdanan sa isyu, klaro nga anaa tanan ni Binay ang suwerte sa pagkakaron. Gawas lang og makasohan ug mabilanggo si Binay tungod sa matud pa kasaypanan nga iyang nahimo atol sa iyang pila ka dekada nga pagserbisyo sa gobiyerno, wa’y padulngan ning tanang imbestigasyon.

Kun magpadayon ang pagyagyag sa senado sa mga giingong baho ni Binay, di’ ni makatabang sa tinguha nga lumpagon ang ambisyon ni Binay nga mahimong sunod nga presidente.

Ug kun si Binay ang pasultihon, unsa pa may gamit sa pakigdebate niya ni Trillanes nga wa’ may direkta nga epekto sa iyang kandidatura ang nagpadayong senate inquiry.

Kun buot g’yud nga gub-on sa administrasyon o sa mga kritiko ni Binay ang iyang tinguha nga modagan sa 2016, kinahanglan nga karon pa lang moduso na ang Malacañang o ang administrasyon sa ilang manok nga moparang ni Binay.

Hangtud nga magdumili ang pikas partido sa pagtuboy og usa ka kandidato batok ni Binay, padayong maangkon ni Binay ang labing taas nga pwesto sa mga survey.

Kun aduna nay kandidato ang pikas habig, mas mahibaw-an kun aduna bay igong taras ang maong kandidato aron lumpagon ang ambisyon ni Binay. Kay kun wa’ siya’y igong katakos sa paghimo niini, aduna pay igong panahon aron makapangita og lain.

* * *

Email: [email protected]. [email protected].