EDITORYAL - Rehabilitasyon napolitika

Misamot og kalubog ang rehabilitation efforts sa gobiyerno sa Tacloban City nunot niining panawagan sa pipila ka mga pundok sa mga survivors nga ideklarar nga ‘persona non grata’ si rehabilitation czar Panfilo Ping Lacson.  Sakto sila nga pwerteng hinaya sa aksyon sa gobiyerno nga ang hinungdan ,langay kaayo ang proseso sa pagpagawas sa pundo.

Samtang wa pa masayod ang gobiyerno kun unsaon pagbahin-bahin ang mga hinabang,  ang mga non-governmental organizations maoy aktibong nanghatag og pagkaon, sapot, baterya, tents , tubig ug uban pa samtang ang gobiyerno nagsige pa og kagubot kun unsaon paghimo sa mga plano ug programa sa rehabilitasyon.

Dili mabasol ang mga tawo sa Tacloban nga nangapil sa rally niadtong Nobiyembre 7 ug 8 atol sa anibersaryo sa Yolanda, kay silay direktang naapektahan ug usa ka tuig na ang milabay wa pa sila mahaw-as sa ilang sitwasyon.

Ang kalangay epekto kini sa burokrasya nga gipaaslom sa politika. Tungod kay dako kaayo ang kwartang nalambigit gikan sa international community ug sa nasudnong kagamhanan,  kinahanglang dunay mga tagsa ka dangaw kabaga nga gihimong  tamdanan unsaon paggamit ang pundo.

Samtang ang United Nations natagbaw sa gihimo sa gobiyerno, lahi ang pagtan-aw sa mga biktima, gisaway kini nga paagi sa pipila ka international aid groups.   Dunay misugyot nga unta luag-luagan ang mga guidelines pagpagawas sa pundo aron matabangan dayon ang mga biktima.

Ang naghawid sa renda sa panggobiyerno ug sa pundo pulos mga politiko, angay hinumdoman nga taliabot na ang eleksyon.  Nag-amping silang naa sa katungdanan nga gamiton unya sa ilang mga kontra ang mga isyu sa rehabilitasyon alang sa kaugalingon nilang mga interes.