Panagtambayayong sa simbahan ug barangay

Ang kagamhanan nakigtambayayong sa simbahan ug barangay pagbantay sa salapi sa lungsod pinaagi sa pag-monitor sa mga proyekto nga himuon sa local governments. Kini, pinaagi sa UBAS kon Ugnayan ng Barangay at Simbahan.

Nindot kini nga tulomanon, subay sa Grassroots Participatory Budgeting Process (GPP) diin gipaapil ug gipasalmot gayud ang katawhan sa barangay level pagpreparar sa national budget. Una kining ginganlan og BUB kon Bottom Up Budgeting.

Matud ni Gemma Bermoy sa DILG, gi-implement na kini nationwide. Sa Cagayan de Oro, ang MOA tali sa simbahan ug barangay, gitiman-an nila ni DILG Secretary Mar Roxas, Edmund Abesamis, national president sa Pambansang Liga ng mga Barangay (PLB) ug Archbishop Antonio Ledesma.

Dinhi sa ato, mianhi sila si Rep. Leni Robredo, DILG Undersecretary Austere Panadero ug si Abesamis. Mirepresentar sa simbahan si Archbishop Jose Palma. Ang kang Fr. Carmelo Diola nga DILAAB maoy gitudlo nga NGO partner uban sa DILG pagpatuman sa katuyoan sa UBAS.

Ang national government mohatag ngadto sa UBAS sa kompleto’ng lista sa mga proyekto sa matag probinsiya sa tibuok nasud.

Matud ni Roxas, dili kini temporary nga programa, kun dili, molungtad kini hangtud nga molampus na kini sa iyang katuyoan. Sunod tuig, ang tanang 1,490 ka lalawigan ug 1,444 ka siyudad makaangkon og mga proyekto gikan sa GPP.

Ang matag lungsod aduna nay kahigayonan pagpili sa ilang gusto nga proyekto balor og P12.5M, ug P30M nga proyekto nga kapilian sa matag siyudad.

Gitataw ni Roxas nga kini’ng maong programa wala mahisupak sa dictum sa separation of State and the Church.

Matud niya: “This is keeping an eye on people’s money by the people themselves.” Pagbantay sa salapi sa lungsod nga dili mahisalaag ngadto sa mga lawom og bulsa nga mga kiriwan og kamot.

Ang simbahan giisip nga labing daku ug kasaligan nga institution sa nasud, angay na lang nga sangpiton ug awhagon pagtabang pagbantay sa salapi sa lungsod.

Sa unang panahon, maghisgot ‘tag budget, wala may labot ang lungsod paghikay niini, sila ra sa gobiyerno ang magsabutsabot, ug labi na sa pagpatuman niini, sila ra ang magbuot.

Karon gi-involved na ang katawhan, pinaagi sa Simbahan ug Barangay.

Matud ni Roxas, “The State recognizes the active role of the Church as an effective partner of the government in the realization of the State aspirations and bringing in more Filipinos out of poverty, especially the marginalized sector.”