EDITORYAL – Naghuwat lang kinsay mobayad

Wala g’yud mokompiyansa si Mayor Michael Rama kay giplansa g’yud nila pag-ayo ang ilang mga argumento aron tingali dili sila magkanga-kanga nga manubag sa pangutana sa mga konsehal sa dakbayan ug aprobahan ang giduso niya nga budget nga P19.1 Bilyones para 2015.

Ang tanang department heads sa Cebu City Hall gipatawag sa mayor ug gitigum sila nga wala patambongi og media aron dili mahibaw-an kun unsa ang ilang mga argumento sa pagkumbinsir sa mga konsehal nga aprobahan ang dako nga budget.

Daan na nga si Konsehal Margarita “Margot” Osmeña, ang tsirman sa Committee on Budget and Finance sa City Council, mipasalig nga dili sila mosupak pag-aprobar og dako nga budget basta mapasabot lang pag-ayo kun unsaon kini pagkolekta.

Usa lang g’yud ang nakaapan sa gilaraw ni Mayor Rama nga dako’ng budget para sa sunod tuig. Kini mao ang kagamay pa sa revenue collection sa dakbayan sa Sugbo hangtud karon.

Samtang ang giaprobahan nga budget para karong tuiga P5.8 Bilyones, ang koleksyon pagka karon wala pa gani makaabot og lima ka bilyon ka pesos ug ania na kita sa Nobiyembre. Kagahapon, gisugdan dayon sa mga konsehal ang pagsuta sa mga sakop sa Local Finance Committee (LFC) kun unsaon pagkab-ot sa dako nga kantidad.

Ang ilang gisaligan mao ra g’yud nga ang dakbayan sa Sugbo makabaligya og kayutaan sa South Road Properties (SRP) apan hangtud karon wala pay mihimo og pormal nga tanyag pagpalit sa buot ibaligya nga 45 hektareyas nga kayutaan.

Samtang daghan kaayo ang kolektahanan og business ug real property taxes nga mokabat unta og bilyon-bilyon ka pesos, apan wala kini mahimo sa atong mga tax collectors nga igo lang naghuwat sa mga magbubuhis kun mobayad ba o dili.