Mahandum ni kanhi Mayor Pedong Ouano

Mipanaw na  sa laing kalibutan ang giilang visionary mayor sa Dakbayan sa Mandaue nga si kanhi  mayor  Alfredo  Zambo Ouano nga amahan ni 6th District Board Member Thadeo Ouano ug apohan ni Mandaue City Councilor Emmarie Lollipop Ouano Dizon.

Nunot niini daghan ang nag-ingon nga sa iyang kamatayon  maoy mahimo sa mga Mandauehanon ang paghandum na lamang sa iyang mga nahimo dihang nangalagad pa siya sa kagamhanan sa Dakbayan sa Mandaue nga nagsugod isip konsehal ug nahimong bise mayor ug hangtod nga nahimong mayor sa maong dakbayan.

Matud pa nila nga nag-unang handumanan nga gikabilin ni kanhi mayor Pedong Ouano mao ang kaugmaran sa reclamation area nga dako  og gikatampo dili lang sa paghatag og kasulbaran sa suliran sa trapiko tungod kay ang dalan sa reclamation area  nakahatag man og dugang dalan nga kaagian sa mga sakyanan nga kaniadto sa iyang panahon  makita na nga naghuot sa pag-agi sa Highway ug  dalan  M.C. Briones.

Dugang pa nila nga sa reclamation area nga giugmad ni kanhi  mayor Pedong Ouano  dili gayud  usab ikalimod nga nakahatag kini og dakong tampo sa pagpausbaw sa panudlanan sa kagamhanan kay    sa reclamation area  mitumaw man  ang daghang establisamento nga nakahatag usab og dakong kahigayonan sa mga Mandauehanon nga makasulod og trabaho.

Adunay nag-ingon nga dihang giplano pa ni Kanhi mayor Pedong ang kaugmaran sa reclamation area maoy iyang nasinati ang daghang pagsupak ug pagsaway  sa mao niyang proyekto kaniadto apan bisan pa man niini sa gihapon iyang gipadayon ang kaugmaran tungod kay hipanglantawan man niya daan ang ikahatag niining kaayohan.