Handumanan ni Yolanda

Lisud balikan sa paghisgot ang kagahapon nga napuno sa mga pagsuway.  Apan kun paladman g’yud ang pagtan-aw sa usa ka kasinatian nga dugay na’ng nahitabo apan dako pa’ng buhi ang mensahe nga hatud niini, mas maayo’ng utingkayon kini pagbalik aron sa kinatibuk-an, wa’ kay laing mapupo gawas sa leksyon nga hatud sa usa ka pait nga handumanan.

Ang bagyo’ng Yolanda nagbilin man og daghang samad sa kasinatian, apan ang iyang gihimo’ng mga pagsuway naghatag og higayon aron sukdon ang imong katakos ug pasensiya. Ug sa katapusan makaingon ka nga nidaog ka batok sa usa ka dako’ng pagsuway.

Sa miagi’ng semana, subli nako nga gibalikan ang da’n nga akong gilakaw uban ang akong cameraman human sa bagyo.    

Pipila ka oras human giigo ni Yolanda ang Daanbantayan, gilampurnas niini ang mga dalan nga mao unta’y kaagian sa nag-unang panginahanglan sa mga biktima sama sa pagkaon ug tambal.  Apan tungod sa nangatumba nga punoan sa kahoy, bisan ang mga da’n dili na halos kapahimuslan. Unom ka oras ko nga naglakaw aron lang g’yud makaabot sa usa ka dapit diin makakita kami og kasakyan.

Nagduwa sa akong huna-huna kaniadto kun unsa ba g’yud diay tinuod ang mensahe sa kahitas-an ngano’ng gitugot ang ingon niadto kakusog nga bagyo.

Labaw sa tanan, nakapangutana ko unsa ba g’yud diay ka dako ang akong kasal-anan aron nga pasuwayon sa maong matang sa katalagman.

Apan lahi na karon ang maong dalan. Sementado na ang halos katunga. Daghan sa mga lumolupyo ang dagko na og pahiyom tungod kay ang dugay na nila’ng gireklamo’ng agianan nahatagan na og tubag.

Kini na unta ang timailhan sa hingpit nila’ng pagbangon gikan sa pagsuway.  Lapad ug lanog ang mensahe ni Yolanda. Ug ang iyang pag-abot sa atong dapit sa miagi’ng tuig, nagbilin og dako’ng hagit kanako, kanimo ug labaw sa tanan, sa atong gobiyerno.

Sa kadaghan sa mga tawo nga nangamatay, sa mga katigayonan nga nausik, sa kalapad sa kadaot nga gibilin ug labaw sa tanan, sa daghang kinabuhi nga nakalas, andam na ba kita sa mosunod pa nga Yolanda?

Kun usa ka tuig human sa makalilisang nga bagyo, susama’ng problema lang gihapon ang giatubang ug susamang kalisang lang gihapon ang motumaw sa matag higayon nga adunay bagyo’ng mosu’d sa Pilipinas, mahimo kaayo kita nga pikatan ni Yolanda.

Apan kun karon, usa ka tuig human sa katalagman mas takos kita nga mosagang sa bag-ong normal nga matang sa panahon, maka-ingon ‘ta nga dako’ng pakyas ang pagpukan ni Yolanda kanato tungod kay aduna kita’y kaisog nga mobarug.

Email: [email protected]. or [email protected].