Permiso nga pataka
Lahi sa ubang mga opisyal sa gobiyerno nga modayon og kasuko ug magtagutago kun mahiagom og mga pagsaway, si Naga City Mayor Val Chiong niluwat sa mosunod nga katin-awan nganong gipaputol niyang mga punoan sa kahoy aron matukod ang dugay na niyang gihandum nga oval sa Naga Central School:
• Way laing luna sa gobiyerno nga katukoran sa oval, kun mamalit og pribadong luna makagasto ang Naga og labing menos P100 milyones sa yuta lang;
• Hagbay rang naguba ang karaang oval sa samang luna, gawas nga mas dako ang tukurong rubberized track oval, susama gyud sa nabantog nga oval sa Cebu City Sports Center;
* * *
• Di tinuod nga gipalabi niya ang oval kay sa mas dinalian ug mas mahinungdanon nga panginahanglan sa classrooms, kay nakatukod na siya og kapin sa 100 ka classrooms ginamit ang Special Education Fund (SEF) sa Naga;
• Di tinuod nga may dakong patong sa P60 milyones nga proyekto ug nga gidalidali pagduso kay nadawat na niyang komisyon, gihagit ang iyang mga kaatbang pagbantay sa aktuwal nga pagpatuman sa proyekto;
• Di tinuod nga wa siya magpakabana sa kinaiyahan, gani sud na ron sa pila ka katuigan ang iyang programa pagpananom og daghang punoan sa Narra, nga gawas nga maoy nasudnong kahoy mao pa gyu’y gipasidunggan sa ngan sa ilang dakbayan.
* * *
Samtang nakabuylo nang pinutlanay sa mga punoan sa Narra, Agoho ug Mahogany sa luna nga tukoran sa oval, nagkasabot ang kadagkoan sa City Hall ug Department of Environment and Natural Resources (DENR) nga di na angay’ng hilabtan ang ubang mga punoan sa kahoy nga gustong ipaputol ni Mayor Chiong.
Nipasabot sila sa DYAB Radyo Patrol nga maangkon na ang igong hawan nga gikinahanglan sa proyekto ug mapatuman na ang tukmang desinyo sa oval nga 400 ka metro ang gitas-on, 72 ka metro ang gilapdon ug may walo ka naglibot nga lanes bisan kun katunga ra sa 79 ka kahoy ang putlon.
* * *
Dihang among gisukmatan si Chiong sa kumpisal sa iyang mga opisyal, nipasabot ang mayor nga iyang mga inhinyero ang nirekomendar nga kinahanglang putlon ang 79 ka punoan. Matud ni Chiong balikon niya og konsulta ang mga inhinyero, apan gihangop nang daan ang kahigayonan nga maibanan ang mga kahoy nga mahilabtan.
Mapahimutang sa pagduda ang katakos ni Chiong sa pagbalanse sa panginahanglan sa iyang mga proyekto ug sa kamahinungdanon sa pagpanalipod sa kinaiyahan. Mapahimutang sa mas dakong pagduda ang kaligdong sa mga lagda sa DENR sa pagsubli sa mga aplikasyon sa permiso pagpamutol sa mga kahoy. Kun nagyangu-yango ra si Chiong sa iyang mga inhinyero, naghangad-hangad ba lang sab sa bungbong ang kadagkoan sa DENR sa ilang pagsentensiya og kamatayon sa mga kahoy?
- Latest
