Gusto’ng magminyo pag-usab

Dear Atty. Divine,

Minyo ko ug duna’y anak, apan buwag. Gibiyaan mi sa akong bana 10 ka tuig na ug wala na g’yud magpakita namo. Ang akong anak nga karon 12 anyos na wala g’yud makaila kaniya kay 2 anyos pa siya sa pagbiya. Akong nasayran nga tua magpuyo sa Manila ang akong bana ug may lain na nga pamilya. Karong bag-o duna ko’y nakaila nga foreigner ug interesado siya nga mangasawa nako. Nagplano ‘sab siya nga pabisitaon ko sa America sa sunod tuig. Ang akong pangutana, mahimo na ba ko nga magminyo pag-usab?  Mahimo ba ko nga mapetisyonan sa akong boyfriend isip iyang fiancée? – Leny

Dear Leny,

Kun interesado g’yud ka nga makigminyo sa imong foreigner nga boyfriend kinahanglan nga mahimong legal ang inyo’ng panagbuwag sa imong bana pinaagi sa pagdangop sa korte aron sa pagpa-annul sa imong unang kaminyuon. Ang panagbuwag sa magtiayon bisan pa kun pila pa kana ka tuig dili makapapas sa imong pagkaminyo. Nagpabilin gihapon kamo nga kasal sa imong bana base sa atong balaud ug ang korte lang ang makaputol sa maong kaminyuon. Mas maayo nga moduol ka og abogado aron iyang matun-an kun aduna bay lig-ong basehan aron imong ipa-annul ang imong unang kaminyuon ug mahimo ka na unya nga makigminyo og lain. Pagkakaron, dili pa sab ka mahimo nga i-petition sa imong boyfriend as fiancée kay inigpangayo og Certificate of No Marriage  or Cenomar sa US Embassy makita man didto nga minyo ka. Mahimo ka nga moadto sa America pagkakaron isip tourist busa Tourist Visa ang imong aplayan og dili Fiancee Visa ang imong gamiton. – Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column.