EDITORYAL – Kampanya balik Colon

Ang plano ni Mayor Michael Rama nga ang dalan Colon dili na paagian og mga sakyanan ug alang na lang kini sa mga tawo nga maglakaw makapasamot lang sa problema sa trapiko diha sa kinapusorang bahin sa dakbayan sa Sugbo.

Gani sa mga higayon nga adunay night market ug sirad-an sa mga sakyanan  ang mubo nga bahin sa dalan Colon gikan sa Osmeña Boulevard paingon sa eskena Mabini makasinati na og grabe’ng problema sa trapiko ang dakbayan.

Mosamot kun lakip sa adlaw sirad-an ang dalan Colon sa mga sakyanan kay itagana na lang kining mao nga karsada sa mga tawo nga maglakaw-lakaw. Tumong ni Mayor Rama nga mobalik ang paglambo sa negosyo sa mga tindahan sa Colon.

Ang rason nga menus ra ang mamalit sa ubang tindahan diha sa downtown area tungod kay ang ilang gibaligya mga bati kaayo nga klase pun-an pa sa mga negosyante nga kusog kaayo mamentaha.

Ang ilang baligya imasyar nila og mahal ngadto sa mga kustomer sa pamasin nga mokubit sa ilang presyo nga itanyag, apan kun utokan usab ang pumapalit takulahaw lang nga pakubsan nila ang kantidad.

Kini nga “ilad-ilad” nga matang sa negosyo maoy makahanaw sa gana sa ubang pumapalit nga mohukom na lang nga adto sa dagko’ng tindahan mamalit kay giplastar na’ng daan ang kantidad sa ilang baligya.

Ang usa sa makakabig pagbalik sa mga pumapalit nga maagni sila pagpangompra diha sa mga tindahan sa downtown area mao nga maayo’ng matang ang produkto nga ilang ibaligya ug iplastar nila ang mga presyo.

Ang kapolisan, kinahanglang maninguha pagwagtang sa mga snatcher, kawatan ug mangunguot aron dili makapaislag sa mga pumapalit.