Makahayblad ang kuwarta

Adunay pagya nga nagkanayon, “Mahayblad kita, basta wala’y kuwarta” Apan sagad sa nakasinati sa sakit nga hayblad, halos kadtong adunay mga kuwarta. Kay mawala na man ang disiplina sa pagpugong sa imong gustong kaunon. Anugnan di kapahimulos sa kuwarta busa patuyang lang sa pagkaon.

Aduna poy tihik kaayo nga ang anaa kanunay sa hunahuna, mao ang pagtigom, aron mas modaghan pa ang kuwarta. Mao nga magmantinil lang og asin o ginamos para ganahan mokaon, hangtud nabuslot ang tinigom kay nahayblad. Nakagasto kay dili na man kabalibaran ang sakit sa panglawas.

Apan niadtong naghinubra na ang kuwarta, luho na sab ang istilo sa kinabuhi. Wala nay higayon sa ehersisyo nga kanunay nagpabugnaw sa lawak. Ang resulta giatake sa hayblad, hangtud mikomplikar kining nagkagrabe. Hinuon nabuhi man tungod sa kuwarta apan dili na kalihok kay nainutil na.

Gikinahanglan baya nato ang kuwarta, kay kun wala’y kuwarta wala’y bulok ang kinabuhi. Magkamang kita sa kawad-on nga haskang paita apan bentaha lang kay bisa’g daut maantigo pa moatiman unsaon pagpahimsog sa lawas.  Igo na makat-on sa pagkontento sa kuwarta, basta may makuot lang nga adunay magamit.

 Nga bisa’g kulangon ato lang inaton ang paglaom nga ihangad sa Dios nga kita hatagan og maayong panglawas. Bulawan ang kahimsog sa lawas nga dili ikatumbasan sa unsa man kadaghan sa kuwarta.

Matngoni lang kun suwertehon kang may kuwarta, seguroa nga dili ka maulipon niini. Kay ihatud kang lisud kabalibad sa daghang tentasyon sa kinabuhi, aron i-unlod ka sa kaalautan nga mas molabaw pa sa kuwartang makahayblad.