Kurakot dili angay’ng pilion

Nag-anam kabulgar ang mga opisyal sa gobiyerno nga may gidawat nga dagko’ng komisyon sa proyekto  nga alang sa publiko.

Ang pagdawat og komisyon gikan sa mga proyekto mas gaan-gaan nga matang sa pangawat sa kuwarta sa gobiyerno.

Ang bug-at nga pangawat sa kuwarta sa kagamhanan mao kadto’ng sama sa pasangil batok kanila ni Senador Juan Ponce-Enrile, Jinggoy Estrada ug Bong Revilla nga midawat sa kuwarta sa gobiyerno nga wala’y gipakitang proyekto alang sa katawhan.

Gawas kang VP Jejomar Binay, si Senate President Franklin Drilon na usab ang gisugdan og yagyag sa iyang giingong dako’ng komisyon sa proyekto alang sa publiko nga iyang gipatukod.

Kun atbangan si Binay og kandidato pagka presidente sa nasud nga wala’y rekord sa pangawat, murag maglisud sa Binay kay ibutang ta nga tinuod ang pasangil nga midawat siya’g komisyon unya dili na siya mangomisyon kun presidente na siya, makabadlong kaha siya sa mga opisyal nga kawatan?

Kun ang kaatbang niya nga wala kasuway og pangawat mahimo’ng presidente, murag mahadlok kini nga mangawat, hinuon isug kini nga mopitol sa mga kawatan.

Busa kun papilion ka kun hain sa duha, aw kaantigo ka usab motimbang-timbang sama niining gihimo sa Espada.

* * *

Naglamanohay diay kuno si kanhi Kongresista Eduardo Gullas (Eddiegul) ug si Mayor JVR sa Talisay City  sa una’ng higayon niadto’ng miagi’ng adlaw.

Apan wala kuno’y estorya. Tingali ang anaa sa ilang hunahuna mao nga magkasangka pa sila pag-usab sa umaabot nga eleksyon aron sukdon ang tinuod nga pulso sa Talisaynon, Eddiegul? O si JVR.([email protected])