Editoryal - Ihaw sa mga baboy apektado

Husto ang gihimo ni Mayor Michael Rama nga hawanan g’yud sa mga illegal structures ang Mahiga Creek apan tungod sa “misunderstanding” tali ni Mandaue City Mayor Jonas Cortes misangpot nga apektado karon ang pagpangihaw og kahayopan diha sa ihawan sa dakbayan.

Nasakpan sa mga sanitary inspectors sa dakbayan sa Mandaue nga ang hugaw gikan sa ihawan sa dakbayan sa Sugbo diha sa North Reclamation Area (NRA) gipaagas ra diay direkta ngadto sa sapa ug mahipunta ra gihapon sa Mahiga Creek.

Resulta, ang mga negosyante og karne gidid-an na pag-ihaw og baboy diha sa ihawan sa dakbayan kun kini mutimbang lang og 50 kilos paubos. Kadto lang mutimbang og subra sa 50 kilos maoy dawaton. Giawhag sila nga adto magpaihaw sa mga pribado’ng ihawan.

Ang mga negosyante nga gihasolan na pagdala sa ilang baboy ngadto sa pribado’ng ihawan, bisan asa na lang molapa sa baboy diha sa daplin sa karsada. Usa ka negosyante og baboy mitug-an nga dunay mga higayon nga anha lapaa ang mga hayop sa “centerisland” ug daplin sa Imus Road, kilid sa nasunogan nga bahin sa Barangay Lorega-San Miguel.

Wala masayod niini’ng mao nga binuang si City Veterinarian Pilar Romero kinsa miangkon nga dili kini tukma. Bisan si City Health Officer Daisy Villa mitataw nga angay kini nga hunongan.

Si Mayor Rama nga nasayod niini mipasalig nga ipasusi dayon niya kining mao nga report kay nakalapas kini sa balaod. Ang pagpangihaw angay’ng adto himoa sa accredited nga ihawan ug dili kay diha sa aseras.

Ang mga hugaw gikan sa gilapa nga mga hayop direkta ra nga gilabay sa kanal.