Editoryal - Kalag-kalag

Adlaw karon sa mga Santos nga gitimaan sa tanang Kristiyano agi og paghinumdom sa mga martir sa ngalan sa Kristiyanismo.

Apan dinhi sa Pilipinas, ang Adlaw sa mga Santos permanente na kining bisperas sa Adlaw sa mga Minatay.

Nobiyembre Uno pa lang, magtapok na ang pamilyang Filipino sa nagkadaiyang mga sam-ang aron paghandom sa ilang mga minahal sa kinabuhi nga mitaliwan na ngadto sa laing kalibotan.

Daghang mga nasulat kabahin sa kasaysayan sa “kalag-kalag” nga nahimo nang tradisyon sa mga Filipino, dunay miingon nga bisan wala pa ang mga Espanyol nagsaulog na niini ang mga nitibo.

Samtang duna say miingon nga kini nga tradisyon nadala sa mga Espanyol dinhi sa Pilipinas tungod sa impluwensya sa Kristiyanismo.

Apan bisan asa pa kini maggikan, mao kini ang adlaw nga diin ang mga pamilyang Filipino mag-uban aron modagkot og kandila alang sa kalag sa ilang mga minatay aron dili kini masalaag ug mag-ampo alang sa kaluwasan ug kapasayloan sa ilang mga sala.

Nahimo usab kini paagi aron magkahimamat sa mga katiguwangan ug ang ilang  bag-ong henerasyon  sama sa usa ka family reunion.

Kadtong dili makahimo pag-uli sa ilang mga lugar  maningkamot g’yud pagduaw sa bisan asang sam-ang aron lang modagkot og kandila para kanila.

Timailhan kini nga bisan sa kamatayon, ang pamilyang Filipino dili g’yud magkalimtanay ug dili basta mabungkag.