Way pugsanay pero way balibaray

Dili na ipadayon ang tinguha nga pagpadonar sa mga tiguwang og ‘tag duha ka libo ka pesos gikan sa ilang madawat nga cash assistance sa kagamhanan sa Sugbo aron itabang pagpatukod sa bag-ong Cebu City Medical Center.

Kini human makadawat og mga pagsupak sa daghang senior citizens ang nahisgotang tinguha ni Rolando “Dodong” Llaguno, ang pangulo sa Office of Senior Citizens Affairs (OSCA) sa dakbayan.

Kun nadayon pa, tuyo unta niini ang pagtigom og labing menus P100 ka milyon nga kuhaon gikan sa nahabilin nga cash assistance sa mga 60 mil ka senior citizens.

Matud ni Llaguno nga boluntaryo ra ang pagpahatag og donasyon ug dili pugsanay ug sa pipila na ka semana nila’ng pagkonsulta miabot na og mga 500 ka tiguwang ang miuyon sa tinguha ug padayon pa ang ilang pagkonsulta sa uban.

Kun wala pa undanga ang laraw, masayran unta nato kun pila sa mga tiguwang nga nagdawatan og tabang salapi sa kagamhanan sa dakbayan sa Sugbo nga andam motabang nga mapabarug ang bag-ong CCMC.

Dili nato ipadaplin ang kamatuoran nga adunay mga tiguwang sa dakbayan nga mga adunahan nga midawat og tabang salapi busa dako ang posibilidad nga andam kaayo silang mohatag og P2 mil gikan sa ilang P12 mil nga cash assistance karong tuiga. Kun ang mga walay nadawat sa dakbayan sa Sugbo mihulog gani og donasyon sa Piso Mo, Hospital Ko nga kampanya sa kagamhanan, unsa pa kaha sila’ng adunay nadawat?

Kun ang mga tiguwang wala pugsa ug wala ma-inpluwensiya sa ilang pagdonar og salapi pagpabarog sa bag-ong CCMC, dili angay’ng babagan ang ilang pagkamanggihatagon.

Ang rason ngano’ng misuki ang ubang mga tiguwang kay wala sila makasabot ug ang mga nagpasiugda wala pud makapasabot pag-ayo kanila kay bisan gani ako nga bata-bata pa ang panabot, nakaingon nga ang donasyon nga ilang gipangayo way pugsanay pero wala poy balibaray.