Unsay andamon kun magpakasal

Dear Atty. Divine,

Duna ko’y pangutana labot sa akong boyfriend nga usa ka Amerikano. Nagplano mi nga magminyo dinhi sa Cebu early next year ini’g bisita niya pag-usab. Gusto niya nga maandam na daan ang gikinahanglan nga mga dokumento pagminyo sa dili pa siya moabot. Unsa may mga requirements kun kami magpakasal pinaagi sa Civil wedding? - Gina

Dear Gina,

Usa sa mga dokumento nga inyong kuhaon sa dili pa kamo magminyo mao ang Marriage License ug adto kana nimo kuhaon sa Local Civil Registrar diin ka nagpuyo. Magkinahanglan kana sa imong Birth Certificate gikan sa NSO ug Certificate of No Marriage kon Cenomar ug  kinahanglan pa ‘sab mo nga mo-seminar. Mas maayo nga moadto ka sa Local Civil Registrar aron mangayo ka sa listahan sa mga dokumento nga imong isumiter kanila alang sa pagkuha og Marriage License. Samtang tungod kay langyaw man ang mopakasal kanimo kinahanglan ‘sab siya nga mokuha og  Certificate of Legal Capacity to Contract Marriage gikan sa iyang diplomatic or consular officials ug apil ninyo kana nga i-submit sa Local Civil registrar. Kun aduna na kamo’y Marriage License bisan pa kun dinhi sa Cebu pananglit nakuha, mahimo na ninyo nga gamiton bisan asa mo sa Pilipinas magpakasal. Apan ang marriage license valid lang sud sa 120 ka adlaw gikan sa pag-issue. Busa kinahanglan g’yud mo nga  magpakasal sud sa 120 ka adlaw gikan sa pag-issue sa Marriage License . Kun Civil wedding inyong gusto, mahimo mo nga magpakasal pinaagi sa Mayor o Huwes og kanang inyong marriage license inyong isumiter kun asa mo magpakasal aron kamo mahatagan og schedule sa inyong wedding. - Atty. Divine