Gukda g’yud ninyo ug siloti

Saludohan nako ang kapolisan nga padayong migukod ug nangita sa mga kriminal nga responsable sa pagpanghadlok ug pagpamatay sa mga inosente’ng sibilyan diha sa kabukiran sa Alcoy, Boljoon ug Dalaguete.

Subo lang hinuon nga palandungon nga nasamdan ang hepe sa kapolisan sa Boljoon sa ilang pinusilay kaniadto’ng Lunes sa udto didto sa Barangay San Antonio, apan sagdi lang kay duha man usab sa mga kontra ang napatay sa mga polis.

Dasigon nako si Police Regional Director Prudencio Tom Bañas, ang mga higala nako nga sila si Cebu PNP Provincial Director Noel Gillamac ug Regional Intelligence Division (RID) Chief Paul Labra nga dili sila moundang paglutos sa mga badlongon.

Angay’ng gantihan og kamatayon kini’ng mao nga mga tawo nga ang uban kanila nakakutlo usab og kinabuhi sa mga tawo nga ilang gipangpatay tungod kay wala mohatag sa ilang gidemanda.

Tambag usab nako sa mga tawo nga nasayod sa binuhatan niini’ng mga pundok sa kriminal nga naghatag og gubot diha sa kabukiran sa Boljoon, Dalaguete ug Alcoy nga report mo sa mga polis ug ayaw kahadlok.

Dili angay’ng kaloy-on kini’ng mao nga matang sa mga tawo nga nagpakabuhi pinaagi sa pagpangilkil. Nahinumdom mo niadto’ng duha ka negosyante og kahayopan nga ilang gipatay didto sa Barangay Nug-as, Alcoy kay wala mohatag?

Bangis kaayo kini’ng mga tawhana nga dili angay nga atong kaloy-on.

* * *

Nasubo lang ko sa report nga apil sa gipangdakop sa kapolisan ang duha ka konsehal sa barangay ug bana sa kapitan sa Naljub, Dalaguete nga nasakmitan og mga armas.

Ang duha ka konsehal sa barangay nga gidakop angay unta nga manalipod sa ilang mga lumolupyo nga gipanghasi sa armado’ng mga tawo ug dili kay modapig na hinuon sila sa mga nagpabadlong.

Hangyuon nako ang kadagkoan sa kapolisan nga hingusgan pa nila ang paglutos sa mga badlongon aron balihon nato ang sitwasyon ug ang mga armado mao na ang magtago-tago ug maghambin og kalisang.

Unya, kamo nga mga opisyal sa barangay, hinumdomi ninyo ang awhag ni DILG Secretary Mar Roxas nga angay’ng maninguha gayud kamo aron mapatunhay ang kahusay ug kalinaw sa inyo’ng mga dapit.

Ang awhag ni Roxas gihimo niya kay iyang nahibaw-an nga adunay ubang opisyal sa barangay nga imbes mokampanya pagsumpo sa mga badlongon sa katilingban, nakigkonsabo na man hinuon.

Si Roxas isip tsirman sa National Police Commission (Napolcom) ug pangulo sa DILG adunay katungod sa pagmando sa kapolisan ug mga opisyal sa barangay nga motrabaho g’yud pag-ayo.