Partido sa media

“AKO MEDIA.” Usa kini ka bag-ong Party-list nga namugna atol sa senemana’ng Tapok-Tapok sa Cebu Media didto sa Cebu Business Hotel sa dalan Colon nga gipasiugdahan sa PAPI kaniadto’ng Oktubre 17.

Si Dr. Paulus Cañete sa Mandaue City College nga maoy mipaila sa maong party-list milarga dayon paingon sa Mindanao human sa tigum sa PAPI aron iyang ipahibalo sa mga sakop sa media sa Mindanao ang Ako Media Party-list.

Inighuman og sabwag sa maong kasayoran didto sa Mindanao, si Cañete moadto usab sa mga dapit sa Luzon ug ubang dapit sa Metro Manila aron pahibaw-on ang media didto kabahin sa mao nga party-list.

Ang Ako Media party-list iparehistro ni Cañete sa Commission on Elections (COMELEC) aron kabotohan sa katawhan ilabi na sa mga sakop sa media ug sa ilang pamilya sa eleksyon unya sa 2016.

Magpili siya og tag-usa ka representante sa Visayas, Mindanao ug Luzon nga maoy morepresentar sa partido sa umaabot nga piniliay.

Wala mopasabot si Cañete kun siya ba ang morepresentar sa Ako Media party-list sa Visayas apan iyang gitataw nga siya ang moparehistro sa maong partido sa Comelec

Siya usab ang mobayad sa mga bayranan sa pagparehistro sa partido sa tumong nga may representasyon ang media sa Kongreso alang sa mga pribilihiyo sa maong grupo uban sa mga pamilya sa media.

Matud ni Cañete nga kun may partido ang mga drayber sa traysikol, ug uban pa’ng grupo, mas gikinahanglan nga may partido ang mga sakop sa media. ([email protected])