Di g’yud motuo’s Erap

Giangkon ni Mayor Michael Rama nga adunay mga higayon nga kanang mobiya siya sa dakbayan sa Sugbo ug moadto sa Manila makigtagbo siya kang Vice President Jejomar Binay, ang pangulo sa United Nationalist Alliance (UNA).

Apan gitataw ni Mayor Rama nga gawas sa kalihukan’g politikanhon sa ilang partido daghan usab siya og mga opisyal nga lakaw didto sa kaulohan nga naglambigit ang dakbayan sa Sugbo.

Nangangkon usab si Rama nga ang mga lakaw usab niya sa lainlaing bahin sa nasud, naghatag usab og kaayohan ug dungog sa dakbayan. Apil niini ang pag-adto niya sa Sabrosa City, Purtugal nga maoy dapit nga natawhan ni Magellan.

Napugos si Mayor Rama pagpanubag kay ako siya’ng gisukna   kabahin sa reklamo sa ubang mga lumolupyo dinhi sa dakbayan nga nakabantay nga subsob kaayo ang iyang pagpanaw ug kanunay’ng wala dinhi sa Sugbo.

Diha’y akong nahibaw-an nga mitambong ang mayor sa kalihukan sa mga lider sa UNA didto sa Manila. Ilabi na nga si Binay nag-atubang og isyu sa giingong kwestyonable nga katigayonan ug pagpa-overprice sa pagtukod sa Makati City Parking Building paspas kaayo ang tigum sa mga opisyal sa UNA.

Apan bilib ko’ng Mayor Rama kay wala gayud molubad ang iyang suporta ni Binay bisan pa og nagkamuritsing na kini sa pasangil ug gani daghan na ang wala ganahi kaniya mao nga padayong mius-os ang iyang popularity rating.

Ang mga alalay ni Binay mipasangil nga kini’ng mga isyu nga milutaw karon binuhatan ni DILG Secretary Mar Roxas ug kabahin sa gitawag og Oplan Stop Nognog 2016.

Si Roxas man gud ang gitan-aw sa UNA nga higpit nga makaribal ni Binay sa pagka presidente karong 2016 ug nag-anam na pagsaka ang  pagka popular ni Mar mao nga ila kining gidudahan.

Apan si Manila City Mayor Joseph Estrada dili motuo sa pagduda nga si Roxas may kalabotan niini kay matud ni Erap nga nasuheto siya sa batasan sa DILG Secretary diha’ng sakop pa niya kini sa gabinete kaniadto  siya usa pa ka presidente.

Ang maayo tingali nga buhaton ni Binay nga iya lang pamatud-an nga wala siya’y nahimo’ng kasaypanan kana kun tinuod nga dili iya ang daghang katigayonan nga matud sa kanhi bise mayor sa Makati, iya kini ni Binay.

Kun dako gud kaayo’g katigayonan si Binay unya wala niya ibutang sa iyang Statement of Assets Liabilities and Networth (SALN) magduda na ang katawhan kun diin niya kuhaa ang kuwarta nga gigamit pag-angkon niini.