Natagbaw ba ang mga Senior Citizen

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Aduna untay balaud nga nagtugot  nga ang mga senior citizen hatagan og financial assistance sa kagamhanan, apan pipila ra ka local government unit ang mituman.

Ang mga tigulang nga nagkinahanglan og ayuda alang sa ilang panglawas, kay dili baya ikalimod nga ang mga señor citizen daghan kaayo og gipamati sa lawas, apan ingon sa napasagdan lamang. Tinuod, adunay pension nga gidawat ang ubang señor citizen, apan kulangon pa gani sa inadlaw nilang panginahanglan. Ang kadaghanan wala gayoy pension ug gipakaon na lang sa ilang mga anak.

Gihimo kining balaud sa señor citizen kay matud pa, dako sila’g natampo sa pagpabarog sa atong nasud. Mao ba? Kun mao, ihatag kang Cesar ang iya ni Cesar ug ihatag sa Dios ang iya sa Dios.

Kaniadtong Oktubre 1, 2014, ang lungsod sa Cordova, nanghatag ngadto sa mga señor citizen. Nagpila ug nagkadusingot ang mga tigulang taliwala sa kainit sa adlaw nga nagpaabot sa ilang madawat. Unsay gihatag?

 Panggunit mo kay tingali’g mahu’g mo sa inyong gilingkoran. Ang gipanghatag, duha ka kilong bugas nga NFA ug duha ka noodles nga kun imong sumahon mikantidad lang og Php 82. Maoy paga-ingnon, may na lang sa wa gyud kay sa malunosan sa gutom niadtong adlawa.

Sa wala pa manghatag og bugas ug noodles, may gipanghatag nga tag Php 2,000 sa milabay’ng adlaw apan kadto rang nag-edad og 75 pataas. Ang wala pa makaabot og 70 ang edad namanyana poren.

Pagkamakaluluoy intawon sa ubang mga señor citizen sa Cordova, way kalainan sa iro nga nag-utas og hulhol kanus-a matagak ang buwan.

Sa atong pakisusi, wa matagbaw ang mga señor citizen sa gipanghatag. Aron matagbaw atong ihatag ang alang kanila aron matagamtam nila ang kalipay nga ilang gipaabot.