Magbuwag na

Hayan magbulag na si Bise Presidente Jejomar Binay ug Presidente Noynoy Aquino kay sa una’ng higayon nga nagkuyog sila sa Malakanyang gisaway ni Binay ang presidente tungod sa isyu sa Disbursement Acceleration Program o DAP. Gisaway usab ni Binay si Noynoy sa dili maayo’ng pagtratar niya ni kanhi presidente Gloria Arroyo ug sa maayong pagtratar niini kang PNP Chief Alan Purisima nga nalambigit usab sa kontrobersiya.

Gipasanginlan usab ni Binay si DILG Secretary Mar Roxas nga maoy nagpasiugda sa demolisyon job batok kaniya. Hayan kini maoy sinugdanan sa pagkaputol sa maayong relasyon nila’ng Binay ug Noynoy.

Ang kaluoy nga gipakita ni Binay ngadto ni Arroyo ug ang pagpanaway niya ni Noynoy timailhan na sa pagsugod sa pagpanguyab ni Binay ngadto sa partidong Lakas diin dako pa og tingog si Arroyo.

Si Binay nakapanimaho na nga dili siya i-endorso ni Noynoy pagka presidente. Namasin man gud si Binay nga siya ang ituboy ni Noynoy ug dili si Mar Roxas tungod sa kasuod sa iyang pamilya sa mga Aquino bisan dili sila pareho og partido.

Nagtuo seguro si Binay nga huyang na si Roxas ug nga dili na ituboy ni Noynoy isip iyang pambato sa umaabot nga presidential election.

Apan tungod sa pagsulbong sa rating ni Roxas sa labing ulahi nga survey sa Pulse Asia ug SWS, nausab ang hunahuna ni Binay kay mura’g iyang nakita nga mabali ang sitwasyon. Si Mar Roxas ang nag-una sa mga survey sa presidential election adto’ng 2010 ug nangiwit si Binay apan mikalit lang pagsulbong si Binay pila ka adlaw sa wala pa ang piniliay.

Mao kini karon ang gikabalak-an ni Binay nga sa ilang panagbagat pag-usab karong 2016, si Roxas na ang modaug. Sa laing bahin, wala motuo si Manila Mayor Erap Estrada, kapartido ni Binay, nga si Roxas ang nagpaluyo sa paghimo’g pasangil batok ni Binay kay nasayod siya sa pagkatawo ni Roxas human niya kini makauban sa iyang gabinete kaniadto sa dihang siya pa ang presidente sa nasud.