Paglaum sa hustisya para ni Ellah Joy

CEBU, Philippines – Nalipay ko nga mitingog ang Commission on Human Rights human gi-dismiss sa Regional Trial Court ang kaso sa pagpangdagit-patay sa 6-anyos nga batang si Ellah Joy Pique sa Calajo-an, lungsod sa Minglanilla niadtong 2011.

Ubos sa doktrina sa political law nga “parens patriae” mahimo kaayong mo-apil-apil ang estado sa kaso nga naglambigit og mga tawo nga sa ilang pobreng kahimtang, edad, o kahuyang sa kapabilidad pagsukol alang sa ilang katungod.

Dili malalis ang kasapian sa sinumbong niining maong kaso nga si Bella Ruby Santos, samot na nga hangtod karon, ang kauban niyang sinumbong, ang iyang hinigugmang si Ian Charles Griffiths nga usa ka Briton, nagpabiling gawasnon didto sa ilang lugar sa Europa ug mahimong makapadayon og suporta kang Bella Ruby pinaagi sa kuwarta.

Bisan wala pa ako makapanglaban, apan nasayod kita sa propesyong legal nga kanunay’ng makatabang ang mga pamaagi sa abogado bisan wala na kini mahasubay sa procedure, basta lang makatabang kini sa pagguba sa kredibilidad sa testimoniya ug ebidensiya sa pikas partido.

Apan sa mga buroka sa korte, makaluluoy ang wala’y kuwarta nga ikasarang sa kakuwartahan sa pikas kampo.

Ang pamilyang Pique nailhan nato pinaagi sa mga report sa media nga nag-ilaid sa kalisod. Daan nang nahadlok si Renante, ang amahan ni Ellah Joy, nga matotyo ang kaso batok kang Bella Ruby tungod sa kawala nila’y kuwarta.

Ning kasoha hinuon, daan ra kong nakapanghupaw human mukagot akong bag-ang sa kalagot tungod sa paglawgaw sa mga polis ning kasoha sa dihang si Supt. Erson Digal pa ang direktor sa Cebu Provincial Police Office (CPPO).

Kun nahinumdom kamo, si Digal kadtong opisyal nga grabeng nakaduot sa usa ka Norwegian nga si Sven Erik Berger ug iyang uyab nga si Karen Esdrelon nga maoy nagdagit kang Ellah Joy. Sukad niadto, wala nay tarong direksiyon ang kaso tungod kay ang tinud-anay nga midagit ug mibuno kang Ellah Joy ug milabay kaniya sa Barili nahatagan og taas-taas nga higayon sa pagpapas sa mga ebidensiya, ug kun tinuod man nga silang Bella Ruby ug Griffiths ang naghimo, nahatagan og higayon nga makaeskapo si Griffiths nga wala maabti sa mga polis nga tua mitutok kang Berger ug Esdrelon.

Kun nagkatawa karon si Bella Ruby ning pagka-dismiss sa iyang kaso, maayong pugngan una niya iyang katawa tungod kay ang kampo ni Ellah Joy wala pa mawad-i og mga dumadapig ug paglaum nga makab-ot ang hustisya.

Nagtuo hinuon ko nga ning sayo nga pagka-dismiss sa kaso, mobukas ang oportunidad nga malili pag-ayo ang mga ebidensiya sa kaso.

Mahimong mudangop ang pamilyang Pique sa International Human Rights Commission sa United Nations tungod kay kining kasoha naglambigit kang Griffiths nga usa ka Briton nga gipasanginlang nag-negosyo og pornograpiya nga naggamit og mga bata.