Cañete nalipay’ng gikiha
Si Dr. Paulus Mariae Cañete nga maoy tag-iya ug administrador sa Mandaue City College (MCC) napakyas sa paningkamot nga dumalahon unta ang Talisay City College (TCC) kay gusto man sa mga estudyante sa TCC nga si Mayor JVR na lang ang padumalahon sa maong eskuylahan.
Apan nagtuo ang kadaghanan nga gidemalas si Dr. Cañete kay gikiha man usab siya sa iyang Dean ngadto sa Visayas Ombudsman ug giawhag nga ipaubos siya sa lifestyle check kay kadudahan kuno ang iyang pagkabutang.
Sa iyang email sa Espada, nagkatawa si Cañete ug bisan wala pa siya makadawat og kopya sa maong kiha gikalipay niya nga giila siya sa iyang mga dean nga siya usa ka opisyal sa gobiyerno.
Hinungdan nga iyang gimandoan ang iyang dean nga kuhaon ang papeles gikan kang Mayor Jonas Cortes nga nagpamatuod nga ang MCC iya sa gobiyerno ug siya mismo si Cañete usa usab ka opisyal sa gobiyerno nga angay paninglan og Statement of Assets Liabilities and Networth.
Matud pa may mga kabtangan si Cañete sama sa tulunghaan ug 13 ka sakyanan nga wala ikasuwat sa iyang SALN, hinungdan nga angay siyang ipaubos sa lifestyle check.
Gimandoan usab ni Cañete ang iyang dean nga ipapangutana niini si Mayor Cortes kun pila ka milyon ka pesos ang iyang gisuhol kaniya aron kun aduna man, paninglan niya ang mayor og back wages.
Nasuko man gud kuno ang maong opisyal sa MCC nga gipapha ni Cañete sa iyang pagka-dean tungod sa imoralidad nga gihimo niini ngadto sa mga estudyante.
Ambot wala ba kaha usab paluyohi ang maong dean sa pamilya’ng Ouano, inila sa natad sa politika sa Mandaue, sa pagkiha niini kang Cañete ngadto sa Ombudsman. Mura ra ba og naglaraw si Cañete nga mokandidato pagka-mayor sa Mandaue City sa 2016, ambot madayon ba kaha kini?
* * *
- Latest
