EDITORYAL – Ilang gipakyas si Ellah Joy

Leksyon na karon sa kapolisan ang nahitabo sa kaso sa pagsignit ug pagpatay sa 6-anyos nga si Ellah Joy Pique kinsa hangtud karon idlas pa gihapon ang hustisya kaniya.

Duha ka mga tawo, sila si Bella Ruby Santos ug fiancée niining Briton nga si Ian Charles Griffiths maoy gipasakaan og kaso kalabot sa kamatayon ni Pique. Ang Briton padayong gawasnon didto sa ilang nasud, samtang si Santos libre na karong mga panahona.

Kuwang pa alang sa korte ang gibug-aton sa mga ebidensya nga gipresentar sa prosekusyon nga gikan usab nakaylap sa kapolisan.

Kung nganong wala kini ma-appreciate sa korte, ang prosekusyon ug mga imbestigador maoy sad-an niini, ilang gipakyas si Ellah Joy. Kun dili sila, kinsa man?

Kung nakasiguro g'yud ang prosekusyon nga ang duha g'yud maoy mihimo sa krimen mas lig-on nga kaso unta ang ilang naduso. O basin kuwang pa g'yud sa mga kahimanan ang kapolisan aron maduot g'yud kung kinsay sad-an.

Sa gipagawas nga desisyon ni Regional Trial Court Judge Ester Veloso, wa kini muingon nga na-acquit na si Santos sa kaso, kondili,  wala  mapamatud-i sa prosekusyon nga sad-an siya sa krimen nga gipasangil kaniya.

Subay sa balaod, ang bisan unsang pagduda sa mga ebidensya nga gipresentar batok sa usa ka akusado kinahanglang adto mopabor kaniya ang hukmanan.   Usa kini ka maayo nga patakaran. Tungod kay mas maayo pang gawasnon ang usa ka gatos ka kriminal nungka mopapriso og usa ka inosenteng tawo.

Pait kaayo alang sa inosenteng tawo nga maoy matanggong og pipila ka tuig nga wala’y sala, maguba iyang kinabuhi, iyang pamilya, iyang pagkatawo. Makausa ra ang tawo mulabay sa kalibutan, mausik pa g'yud sud sa prisohan sa sala nga wala niya buhata.