Ang birtud nga masaligan

Sa kinabuhi, gikinahanglan gayud nga maantigo kita mopahigayon og mapuslanong diskarte. Aron sa paglambo, sa unsa man nga butang gipiyal kanato nga kita mahimong masaligan. Kadaghanan wala kini kahatagi og pagtagad, nga unta aron molambo unahon ang pagpaangat nga itaas ang ang-ang o ang lebel sa atong pagkatawo.

Wala’y labot dinhi ang kamaayong laki o kahawod sa nabatonan nga abilidad. Tungod kay bisan pa man, unsa ka taas sa imong posisyon o responsibilidad, mahimong mawad-a’g kapuslanan kun dili ka kapiyalan sa maong pagsalig. May angay kang palandungon sa ingon niining butanga.

Kun buot kitang maila nila ang katakos mo, kinahanglang labing maayo nga himuon, ang ilhon pag-ayo ang kabililhon sa pangalagad o pagserbisyo. Ug ang unang rekisitos ini, mao ang pagkamatinud-anon sa kaugalingon. Nga sensiro buhaton ang kutob sa masarangan. Aghat sa kabubut-on kun molihok.

May inisyatibo nga wala’y pakaaron-ingnon o nagpahiping lain nga motibo. Kini mao ang epektibong gahom sa birtud nga kita masaligan. Dungog kining dili katumbasan sa bahandi. Ligdong kining puhonan sa atong pagpakabuhi. Dili na kinahanglan pangitaon ang maayong kapalaran, kay ikaw nay ilang gikinahanglan nga kabahin sa ilang pangandoy nga sila magmalampuson.

Wala nay makalabaw, ni nga makahatag og daghang kahigayonan o tsansa alang sa kabulahanan sa imong kinabuhi. Mahimong daghan ka sab masinating mga pagsulay, apan ayaw gyud lugaki ang lig-ong prinsipyo mo. Kanunay mo lugwayan ang pailob, pag-antus ug pagsalig sa kahitas-an.