Pakyas ang Team Rama

Ang mosunod maoy mga leksiyon nga nakat-onan ni Cebu City Mayor Mike Rama sa kapakyas sa iyang mga konsehal sa Team Rama pagsakmit sa mayoriya sa City Council gikan sa Bando Osmeña-Pundok Kauswagan (BOPK):

"Di angay nga magpatuga-tuga og sugod kun di diay katiwas;

"Mas maayo nga pasagdan ang kahimtang nga way klaro kay sa pagklaro sa kahimtang nga mahimong di mopabor nimo;

"Ang panaghigalaay, bisan unsa kasuod, way dag-anan sa utang kabubut-on; ug

"Bisan siya ang nagkontrolar sa dakong bahin sa puntil sa dakbayan ug bisan makapanental og mga proyekto ngadto sa iyang mga dumadapig ug mga kaatbang, di pa inutil si kanhi mayor Tommy Osmeña.

* * *

Nasukwahi sa nabantog nga kamapailubon ni Rama ang gihimo sa iyang alyadong mga konsehal nga pagduso sa pagdeklarar nga bakante sa tanang mga komitiba sa sesyon sa konseho niadtong Miyerkules. Niangkon si Rama atol sa Arangkada sa DYAB Abante Pa, Bisaya! nga siya ang nag-awhag sa Team Rama pagklaro na kinsay ila ug kinsay taga BOPK.

Di maayong timaan sa kalidad sa liderato sa Team Rama nga samtang ilang sakop nga si ABC Cebu City Federation President Philip Zafra maoy nidiskurso paglahugay sa mga komitiba, lain nilang sakop nga si Konsehal Hanz Abella mao ra say nagdalidali pag-awhag paghunong sa sesyon dihang naklaro na nga wa nila ang numero.

* * *

Dihang gitugotan si Rama sa konseho pagbaligya sa pipila ka luna sa SRP, nakumbinser ang mga Sugbuanon nga iya nang mayoriya sa mga konsehal. Nahimutang hinuon sa pagduda dihang sa nisunod nga mga kontrobersiya nibotar na sab ang mayoriya batok niya.

Apan iya na lang untang gipasagdan ang mga komitiba. Kapasidunggan pa nga magnanimous sa iyang kadaogan kay gipasagdan ang naapiking mga konsehal sa BOPK pagpabilin sa ilang mga komitiba. Tungod sa marka pataka nga pagsugod, nakahigayon na hinuon ang BOPK pagsilot ug pagpanimawos sa ilang kanhi mga sakop nga nibalitok sa Team Rama.

* * *

Nga nagmatuod nga di pa inutil si Osmeña. Samtang igo na lang sa pagpanaway sa pamolitika sa pagpanghatag ni Rama, si Osmeña dako pa og tingog sa Malakanyang ug ubang nasudnong mga buhatan sa gobiyerno. Bisan di nang katugbang sa puntil ni Rama, kamao pang mangita og laing dag-anan, sama sa pagkuhit sa dakong utang kabubut-on ni Konsehal Bob Cabarrubias niya.

Gihapuhap ni Rama ang iyang mga konsehal pinaagi sa pagpahinumdom nga dako nang kadaogan nga nagsugod sila og upat ug karon walo na. Ang kapildehan sa Team Rama nakapatumaw sa kahinog ug kaligdong ni Bise Mayor Edgar Labella. Kalma siyang nihusay sa init nga lalis pinaagi sa pagsalikway sa teknikalidad ug pagdawat sa pait nga kamatuoran nga minoriya pa diay sila sa konseho.