Eklipse sa buwan
Dili kita maghisgot og relihiyon dinhi, kay basin masaypan ta nga nangampanya og mga sakop sa atong relihiyon, apan sa miaging Miyerkules sa gabii diha’ng mura’g dugo ang buwan (blood moon) kay matud pa, gikaon sa bakunawa, o “lunar eclipse” daghan ang nalipay ug daghan usab ang naguol.
Kay naa man gud sa Biblia nga usa sa timailhan nga hapit na mobalik nganhi sa yuta si Cristo, mahisama sa dugo ang buwan.
Tungod kay napula man tuod ang buwan kay nasalipdan man kini sa kalibutan ug wala na madan-agi sa kahayag sa adlaw aron unta makadan-ag usab kanato panahon sa gabii, daghan ang nagtuo nga “mobalik na si Cristo”.
Ambot mura man og gisayonan ang kadaghanan sa pagbalik ni Cristo. Sumala sa Biblia, duha ra ka lugar ang padulngan sa tawo inigbalik ni Cristo.
Sumala sa Biblia, kun iya ka ni Cristo, ikaw ra ang tuyo sa Iyang pagbalik nganhi sa kalibutan, aron ikaw Iyang dad-on ngadto sa langit.
Kun pinili ka ni Cristo nga namatay sa pag-alagad Kaniya ug sa Iyang amahan nga mao ang Dios nga makagagahum labaw sa tanan, aw inigbalik niya banhawon ka uban sa mga buhi Niyang pinili ug dad-on kamo sa langit ug adto na kamo mopuyo nga wala nay kamatayon sa katuigan’g walay katapusan.
Apan kun namatay ka nga dili pinili ni Cristo, aw buhion gihapon ka ug kauban sa mga buhi nga dili Niya pinili, itambog sa linaw nga kalayo ug asupri, mag-ampo ka nga unta mamatay na lang, apan didto matud pa wala ka nay kamatayon nga mag-antos sa hilabihan’g kainit sa katuigan’g walay katapusan, kining tanan mabasa diha sa Biblia.
- Latest
