PDAF sa Mandaue gipakatulog

Giawhag sa Commission on Audit ang kagamhanan sa dakbayan sa Mandaue nga iuli ngadto sa nasudnon’g panudlanan ang P10.8 milyones nga Priority Development Assistance Fund (PDAF) nga wala nila gamita pagpatuman og mga proyekto.

Ang awhag sa Commission on Audit gibase kini sa COA Circular No. 94-013 nga nagmando sa pag-uli sa pundo nga wala magamit ug kadto’ng mga sobra sa nagasto ngadto sa Department of Finance aron magamit pa kini sa laing mga proyekto.

Sa pakisusi nga gihimo sa COA, ilang nasuta nga adunay P31 milyones nga pundo ang dakbayan sa Mandaue diin P4.3 milyones niini ang gikan sab sa PDAF. Ang nahisgotang kantidad alang unta kini sa 164 ka proyekto ug kalihokan nga pasiugdahan sa nahisgotang dakbayan.

Ang COA nagkanayon nga tungod sa kapakyas sa kagamhanan sa Dakbayan sa Mandaue sa pagpahibalo sa ilang buhatan kalabot sa pundo sa PDAF nga wala magamit, gihikawan niini ang mga Mandauehanon nga makapahimulos sa mga programa o proyekto nga mapundohan unta niini.

Pagkasayang sa pundo nga gipakatulog lang sa mga opisyal sa Mandaue. Samtang ang ubang local government unit nagsiring-siring sa pagpangita og pundo alang sa ilang mga programa ug proyekto, ang dakbayan sa Mandaue mipakatulog lang niini.

Unsa man kahay hinungdan niini? Naghinubra na ba ang salapi sa dakbayan sa Mandaue mao’ng dili na sila makaato paggasto niini o tanga lang g’yud ang ilang mayor mao’ng wala masayod sa pundo?

Unsa ra man diay ang gihimo ni Mayor Jonas Cortes nga sa ginagmay nga mga programa ug proyekto nga aduna nay pundo wala man makapatuman? Rason kini nga ipauli na lang ang mao’ng kuwarta.