Mayor Cortes gidayeg
Gidayeg sa taga Talisay City si Mandaue City Mayor Jonas Cortes sa pagpahuwam niini sa ilang vacuum truck paghinlo sa nabarado nga imbornal sa palibot sa Tabunok public market.
Una nga mipasalamat kang Mayor Cortes mao si Talisay City Administrator John Yre Delos Reyes kinsa mipahibawo bahin sa kapungot sa mga tawo sa Tabunok kang konsehal Danny Caballero kay kuno nagpunay lang og saad nga sulbaron ang nabara nila’ng imbornal apan walay aksyon.
Karon nga nasulbad na ang problema, gibaoran ang tanan nga dili magpatuyang paglabay sa ilang basura ngadto sa imbornal aron dili na kini mabara.
* * *
Sakit baya ang witik ni PNoy batok sa “KBL” nga dili na angay pagastohan sa kuwarta sa gobiyerno.
Namatngonan tingale sa presidente nga himuon kini nga puhonan sa ubang mga opisyal sa gobiyerno ang kuwarta sa kagamhanan pagtabang sa kasal, bunyag ug lubong.
Gumikan sa kapungot sa mga Obispo kinsa mawad-an og panginabuhi kun wala nay mobayad sa kasal, bunyag ug lubong, gihulga si PNOY nga papahawaon sa katungdanan.
* * *
Suwerte kaayo ang mga sakop sa Cebu Association of Media Practitioners (CAMP) nga gipangulohan ni Jun Arigo kay may scholarship na ang ilang mga anak, busa magpasalamat kita kang Jun sa iyang paningkamot.
Congratulation kang John Thaddeus N. Campo nga migraduwar isip Cum Laude sa UP Manila ug 10th Placer usab sa Chemist Licensure Exam nga gipahigayon didto sa Manila kaniadtong Sept. 16, 2014. Pahalipay gikan sa iyang ginikanan Gerry ug Meann Campo sa San Isidro, Talisay City.
* * *
- Latest
