Nahibaw-an na g’yud

Sa wala pa molarga si Mayor Michael Rama paingon sa Purtugal kaniadtong miaging semana, gipatawag niya si Konsehal Noel Eleuterio Wenceslao ug gihisgotan na nila ang reorganization sa committee chairmanship diha sa City Council.

Giangkon ni Konsehal Wenceslao nga gisukna siya ni Mayor Rama kun mahimo ba nga siya ang mohupot pagka tsirman sa committee on budget and finance, ang giisip nga usa sa labing gamhanan nga komitiba sa konseho.

Wala mobalibad si Wenceslao ug mitug-an nga karong Miyerkules, mobotar siya nga himoan og kausaban ang chairmanship sa konseho pinaagi sa pagpahigayon og eleksyon.

Matud ni Wenceslao nga giingnan niya ang mayor nga makamao siya sa mao nga trabaho kay sa bangko man siya nagtrabaho kaniadto ug nakahuman siya sa kurso nga accountancy.

Ang pangutana, kinsa man ang gusto sa Team Rama nga mogunit sa pagka tsirman sa committee on laws? Lagmit si Konsehal Nendell Hanz Abella kay siya ra man ang bugtong abogado sa mga konsehal nga alyado sa Team Rama walay labot ni Vice Mayor Edgardo Labella.

Pagka alegre na sa politika sa dakbayan sa Sugbo bisan og layo pa kaayo ang sunod eleksyon. Ingon usab niini ang politika sa kaulohan.   

* * *

Wala g’yud ko masayop nga maapektahan ang kapopular ni Vice President Jejomar Binay tungod sa giingon nga “overpricing” pagpatukod sa Makati City Parking Area diha nga siya pa ang mayor sa Makati.

Mao na kini ang akong giingon nga angay gayud nga dili magpadiki-diki si Binay sa pag-atubang sa senado nga nag-imbestigar niini nga anomaloso nga proyekto.

Tiaw mo nga sa labing uwahi nga survey, mius-os ang kapopular ni Binay. Butang kini nga dili maayo sa tinguha niya nga magpapili sa pagka presidente sa eleksyon unya sa 2016.

Daghan ko og mga gikahinabi, ang akong doktor, mga higala nga magpapatigayon, nagpakisayod unsa na ang kalamboan sa politika sa nasud. Nasabot nako nga gusto sila nga “updated” sa isyu.

Hinuon, kun imong tan-awon ang resulta sa survey, labaw pa gihapon si Binay apan padayong mitidlom. Usa sa mga ilado nga gidungog nga molansar ‘sab pagka presidente nga si DILG Secretary Mar Roxas ubos ra og rating kay kang Binay, apan makita nga anam-anam nga misaka.

Dili man gud maayo nga ang tawo nga gusto’ng mag-presidente sa nasud adunay lama sa pagduda nga nakahimo siya’g binuang mao nga alang kang Binay, angay niya nga tubagon ang pasangil aron dili mosamot ang pagsukarap sa iyang ratings.