Lugway sa termino?

Naumol dinhi sa Sugbo ang bag-ong panawagan alang kang Presidente Benigno Aquino III pagkanaug sa katungdanan. Ang National Transformation Council mipagawas og deklarasyon kaniadto’ng Miyerkules nga nagkondena sa mga kahiwian sa kasamtangan nga administrasyon.

Sa manifesto nga giulohan og “Cebu Declaration: Defining the first steps towards national transformation,” ang NTC miakusar ni Aquino nga wala na kunoy moral ascendancy nga modala pa sa renda sa pangagamhanan sa nasud.

Mga inila sa katilingban ang nagpaluyo sa mao nga konseho. Kini gilangkuban nilang Cebu Archbishop Emeritus Ricardo Cardinal Vidal, Lipa Archbishop Ramon Arquelles, Davao Archbishop Emeritus Fernando Capalla ug kanhi senador Francisco “Kit” Tatad.

Ambot kun epektibo ba kini’ng mao nga panawagan sa NTC. Siguro dako kaayo nga milagro kun paminawon ba kini ni Aquino. Sa ako’ng nakita, mora’g gusto pa gani og ikaduha nga termino ang presidente.

Adunay pipila ka sektor ang padayon karon nga miduso alang sa lain pa nga termino ni Aquino. Gani, sa usa ka full page advertisement sa usa ka nasyonal nga pamantalaan, matud nila nga wala nay mas maayo pa nga mopuli ni Aquino sa iya nga katungdanan kundili si Aquino ra mismo.

Alang niadto’ng mga kontra sa administrasyon, dako nga kataw-anan ang mao nga advertisement. Tiaw mo ba nga gusto na usab nila nga manihuon ang Konstitusyon aron pag-abli sa ganghaan alang sa lain nga termino sa presidente.

Mao gani nga kamulo nga gihandos karon ang Charter change nga nagtumong pagwala sa limit sa termino sa presidente. Kini aron sa ingon nga makadagan pa pag-usab si Aquino alang sa ikaduha niya nga termino.

Apan sa nagkadaiya nga kontrobersiya nga gikalambigitan niini’ng kasamtangan nga administrasyon, uyon pa ba kamo nga lugwayan pa ang termino ni Aquino? Daghan man siguro ang mouyon, apan mayoridad siguro ang dili na gusto.

Maayo man ang dagan sa ekonomiya sa nasud apan dili kini garantiya nga nagkinahanglan og lugway ang termino ni Aquino. Igo na ang unom ka tuig alang sa iya nga administrasyon kun ang Batakan nga Balaud maoy ato’ng basihan.