Nakabawi na si Roxas

Milayat sa ikaduha’ng puwesto si DILG Secretary Mar Roxas sa pinakaulahi nga resulta sa survey nga gihimo sa Pulse Asia kaniadto’ng Septiyembre 8 hangtod sa 15, 2014.

Sa gipahigayon nga survey gipangutana ang 1,200 ka respondents sa tibuok nasud kun karon ang eleksyon kinsa ang ilang pilion nga presidente sa mga pangalan nga nakalista.

Gipasabot usab nga mahimo sila nga makasuwat og ngalan kun kini wala sa listahan ang ilang gusto nga mahimong presidente.

Ang resulta, nag-una gihapon si Bise Presidente Jejomar Binay sa mga gipapilian apan mihagba ang gidaghanon sa mga nakagusto kaniya nga mahimong pangulo sa nasud.

Nagsunod kang Binay mao si Secretary Mar Roxas kinsa nakakuha og dakong puntos ning higayona. Kun sa miagi’ng Hunyo adunay 44 porsiyento ka mga Pinoy sa National Capital Region ang gustong mapresidente si Binay, sa ulahi’ng survey sa Septembre, 33 porsiyento na lang ang iyang nakuha. Si Roxas mikitkit sa labaw ni Binay ilabi na gayud sa Visayas area tungod sa maayong performance niini isip sekretaryo sa interior government. Kini matud pa sa iyang political officer dinhi sa central Visayas nga si Eliseo Puno nga nahinabi nako sa akong tulumanon sa radyo niadtong Lunes sa gabii. Samtang ang kontrobersiya nga gikalambigitan sa bise presidente mao ang gitumbok sa Pulse  Asia survey nga maoy hinungdan sa pagtoirik sa rating niini.

Kun mamentinar o mapatas-an pa ni Roxas ang iyang maayo’ng trabaho karon ug magpadayon ang mga kontrobersiya nga maglambigit ni Binay, sa dili madugay malabwan ra gayud ni Mar Roxas ang rating sa bise presidente ug mabali na unya ang dagan sa panahon.

Kay karong higayona miabot sa dunggan ang ngisi sa mga tawo ni Mar Roxas dinhi sa Central Visayas unsa pa kaha kun molabaw na gayud sa bise presidente si Mar Roxas?