EDITORIAL - Politika sa konseho

Ingon sa dili na g’yud makahuwat pa ang Team Rama karong sunod tuig aron nga mahulipan nila si Konsehal Margarita “Margot” Osmeña pagka tsirman sa Committee on Budget and Finance.

Kini maoy hinungdan nga gikanselar na lang ang sesyon unta sa mga sakop sa konseho sa dakbayan sa Sugbo kagahapon bisan og wala pa makasugod ang mga konsehal pagdiskuter sa mga gihan-ay nga mga isyu.

Human sa tinak-opan nila nga tigum didto sa caucus room, walay bisan usa sa mga konsehal nga nagpa-interview sa mga reporters. Gipang-off nila ang ilang cellphones ug ang uban dili motubag.

Ang siyam ka konsehal nga alyado sa Bando Osmeña Pundok-Kauswagan (BOPK) nga gipangulohan ni Konsehal Margot Osmeña nagtigum apan miingon nga nauyonan nila nga si Vice Mayor Edgardo Labella ra ang gitahasan nila sa pagpasabot kabahin sa isyu.

Nasayran nga gusto na g’yud diay unta sa Team Rama nga si Margot ipatangtang sa gihuptan niya nga komitiba, apan wala kini madayon kay gi-adjourn man pagsayo ang sesyon.

Giangkon na sa Team Rama nga problema nila si Konsehal Osmeña kay hapit na ang Annual Executive Budget 2015 isumiter sa konseho sa dili pa ang Oktubre 16.

Gusto si Mayor Michael Rama nga daku-dako ang budget nga magahin para sa sunod tuig, apan ang baruganan sa committee on budget mao nga aprobahan lang nila kun ang isugyot nga Annual Budget mahimo nga makolekta.

Kinahanglan gayud nga ang kantidad sa budget nga iduso sa mga chief local executive makolekta g’yud ang kantidad aron dili maglaum ang mga tawo nga adunay proyekto apan dili mapatuman.