Ayaw na kamo’g abuso!

Pipila ra ka passenger jeepney drivers nga sakop sa grupo nga PISTON ang misalmot sa protesta ug rally nga ilang gihimo didto sa opisina sa Department of Energy (DOE) ug sa Land Transportation Office (LTO).

Nakasabot na tingali ang ubang sakop sa mao nga grupo nga dili tukma ang ipahimo kanila sa ilang mga lider. Base sa hulagway nga gihatag kanako sa among photographer, wala gani kaabot og 50 ang miapil sa protesta.

Base sa ilang plakards, nasayran nga ang nag-una nila nga demanda mao nga hatagan sila’g P6 nga “government subsidy” sa kada litro nga paliton nila nga grudo ug gasolina.

Giawhag usab sa PISTON nga ihunong na ang pagpatuman sa Bench Warrant nga giisyu sa hukmanan aron dakpon kadto’ng mga drayber nga abusado ug wala magtagad sa dagko nila nga multahan sa CITOM.

Gireklamo usab nila ang tag-as nga multahan nga gilatid diha sa Joint Administrative Order 2014-01. Pastilan, mangayo mo’g fuel subsidy nga ta’g P6 kada litro nga inyo’ng matubil?

Kanunay man gani kamo nga makaganansya kay kasagaran kaninyo P8 g’yud ang kolektahon gikan sa inyo’ng mga pasahero. Kaniadto’ng Lunes sa hapon, misakay ko’g PUJ gikan diri sa downtown area paingon sa Ramos.

Nakabantay ko nga ang drayber sa PUJ nga akong gisakyan tag P7 ra g’yud ang iyang gipangkolekta gikan sa mga pasahero. Saludo ko sa mao nga drayber.

Apan pagbalik nako gikan sa Ramos paingon diri sa downtown, P8 g’yud ang gikolekta sa drayber diha nga gitunolan nako og tibuok P10. Angay ba gud nga kaluy-on kini’ng matanga sa mga drayber?

Si Greg Perez sa PISTON miingon nga madakpan g’yud kuno sila kay mapugos sila paghunong sa mga “No Stopping Area” kay unsaon nga adto man ‘sab kuno ang mga tawo maghuwat.

Taphaw nga tubag. Unsay kapuslanan sa inyong kahugpongan Mr. Perez? Ngano nga dili man kamo magsabot nga dili hunongan ang mga pasahero nga maghuwat sa dili tukma nga dapit?

Kun inyo kini nga himuon, makatabang pa kamo nga matudloan ninyo’g leksyon ang mga sumasakay. Ang dagko nga multa nga gilatid sa JAO 2014-01 ipatuman sa tanan.

Bisan ako mahimong makamulta og dako kun depektoso ang akong suga unya ako lang pasagdan. Apan dili kana mahitabo kay disiplinado ko nga pagka drayber.

Isip lider sa grupo’ng PISTON, ikaw Mr. Perez dako kaayo og kaakohan nga tudloan ang mga kauban nimo’ng drayber nga dili na sila moabuso.