Pildero nga nagmadaugon

Aduna ko’y suod nga higala nga mahiligon kaayo sa sugal. Bisag unsa lang ang entrahan o paliton nga tiket. Wala ko kahinumdom nga nakadaug, tingali kun duna man, alkanse sa dakong napuhonan niya sukad niadtong ulitawo pa. Nga karon naminyo apan pildero gihapon kay wa makapaanak. Hinuon daghan siya’g mga apo kay may mga anak silang gipanagop, nga pulos mga minyo na.

Maayo mangita og panguwarta para adunay ikasustener sa iyang bisyo sa sugal. Mao lagi, apan di kaantigo mogamit sa utok kun unsaon nga makadaug. Sa laktud, grabe na ang pagkaungo nga mora’g naadik sa sugal. Maayo gani kay nakaamgo pa nga pildero gayud siya niini.  Mao naghimo siya’g laing bisyo nga ning higayona, iyang isugal ang kinabuhi nga iseguro na gayud ang iyang kadaugan. Dili na makatugot nga mahimong pildero ning higayona.

Tungod kay nakasandig ang puhonan niini alang sa pag-amuma sa iyang mga pamilya. Gibati na siya’g kalisod apan wa kini niya panumbalinga. Sayud siya nga kun di kaantos, ikaduha na pud ning kapildehan. Way bale mapilde sa salapi basta dili lang ang tinubdan sa kinabuhi. Nga mao ang pagsustener nga matudloan sa dili pagsundog sa nasinating dakung kapakyasan nga madato.

Tuod  man gibuligan sa kahitas-an ang iyang grabeng pagsakripisyo nga madumalahan sa hustong panlantaw sa ilang mga pangandoy. Gigiyahan niya nga di madiskaril sa ilang tumong nga kabulahanan ug malipayong kinabuhi.

Karon dako ang iyang pasalamat sa Kahitas-an. Bisan siya pildero apan nagmadaugon siya sa paglampus, nga hinurot ang pailob, hangtud pulos na nagmadaugon ang tanang miyembro sa iyang mga pamilya.