Stigmata

Sa miaging Septiyembre 23, atong gisaulog ang tinuig nga pangilin ni Saint Pio of Pietrelcina, kinsa giila sa kadaghanan nga Padre Pio. Gisaulog usab kini sa nagkalainlaing nasud nga Kristohanon.

Usa ka Italian mystic monk sa Order of Capuchin Friars si Padre Pio ug natawo sa Mayo 5, 1887. Giordinahan pagka pari sa tuig 1910.

Septiyembre 20, 1918, samtang nagluhod siya atubangan sa usa ka dakung crucifix, iyang nadawat ang stigmata, ang unang stigmatized nga pari sa kasaysayan sa simbahan. Unsa man ning stigmata?

Giingon dinhi: “stigmata – the wounds of Jesus Christ – on his hands, feet, and side of his [Padre Pio’s] body.” Sa ato pa, ang mga samad ni Cristo nakita diha sa lawas ni Padre Pio.

Diha kini kaniya sulod sa 50 ka tuig, gikan sa 1918 hangtod 1968. Sa ato pa, gibati usab niya ang kasakit sa maong mga samad. Giingon nga siya ang patron saint sa mga civil defense volunteers.

Sa iyang gipuy-an, sa bungtod nga siyudad sa San Giovanni Rotondo sa Italy, nagtukod siya’g medical ug religious center.

Mao nga ang maong siyudad nga naila’ng Shrine of Padre Pio, atua mahimutang ang iyang lubong ug ubang mga relics sa iyang pagkatawo.

Ang maong Shrine nga duawon sa kapin sa siete milyones ka dumoduong ug mga devotees matag tuig, ikaduha lang sa gidaghanon sa moduaw sa Our Lady of Guadalupe Shrine sa Mexico City.

Dinhi sa ato, ang mga deboto ni Padre Pio mitukod og duha ka pilgrim sites sa St. Pio of Pietrelcina Center sa Libis, Quezon City ug National Shrine of Padre Pio sa Sto. Tomas, Batangas nga nakadani usab og mga pilgrims matag tuig.

Dunay mga healing masses sa maong duha ka dapit matag ika- 23 sa bulan, diin ang mga pangaliya sa mga deboto ug mga pilgrims gisukad sa tugon ni Padre Pio nga: Pray, hope, don’t worry. So, pag-ampo, paglaum, ug ayaw kaguol – paglipay.

Matud pa, “he spent his remaining life sharing his spiritual gifts with the people, including healing, prophesy, and counseling.”

Namatay si Padre Pio kaniadtong Septiyembre 23, 1968 diin ang stigmata hingpit nga nahanaw ug gi-canonize pagka santos ni Santo Papa John Paul II sa Hunyo 16, 2002.