Magbilin og legasiya

Walay plano si Cebu City Mayor Michael Rama nga tukoran og condominium ang mga illegal settler gumikan sa hilabihan na kadaghan niini.

Apan kun may kuwarta  ang siyudad, aw ngano’ng dili man, nga  wala may laing gilantaw ang kagamhanan kundi makapuyo og tinuod nga balay ang tawo.

Kini tungod kay ang tawo lahi sa iro ug iring nga mahimo ra nga mosilong sa balay sa ilang mga agawon, ang tawo nagkinahanglan og balay nga kapahuwayan sa iyang pamilya.

Lahi sa siyudad sa Talisay nga nangita na og yuta karon ang kagamhanan sa maong dakbayan aron tukoran og condominium alang sa mga illegal settler niini.

Gilantaw ni Mayor JVR nga magbilin siya og legasiya nga mahandom sa mga kabus kun wala na siya sa katungdanan.

Dili hinuon kaayo daghan ang mga illegal settler sa Talisay itandi sa mga anaa sa siyudad sa Cebu.

Mas gamay-gamay ra og gasto ang condominium kay sa tagsa-tagsa ka balay nga tukoron ug madaginot nimo ang luna nga tarokan niini, samtang ang balay, iduyog nimo ang gidak-on sa yuta nga tarokan niini segun sa gidaghanon sa mga eskuwater nga papuy-on niini.

Hinuon may gitagana na nga plano si Mayor JVR  human ikabutang og condominium ang tanang eskuwater karon.

Kini pinaagi sa paghigpit na sa pagbantay batok sa mga illegal settler  nga buot mopuyo sulod sa siyudad sa Talisay.([email protected])