Sitoy batok Radaza?
Kun makabantay kang mas mapahiyumon ang imong mga higala nga Oponganon, tingali nakabati na sila nga magparehistro si Cordova Mayor Adelino Sitoy isip botante sa Dakbayan sa Lapu-Lapu. Di kang kabasol nila. Human sa daghan na uyamot nga katuigan nga nagpabiling masulub-on ang ilang kahimtang ubos sa pagduma sa mga Radaza, mahimong determinado na silang molingkawas.
Kun tinuod nga nakahukom nang mga Sitoy paghagit sa liderato sa Opon, maglisod nang mga Radaza pagkatug nga maghayang. Mas seryusong hulga ang ikatanyag ni Sitoy kay sa nangagi nilang mga kaatbang sa politika. May sukaranan ang panghinaot sa nagpakabana nga mga Oponganon nga hapit na moabot ang adlaw sa panudya.
* * *
Nagbinugtong nga nibarug batok sa mga Radaza sa nangaging mga piniliay mao ang negosyanteng si Efrain Pelaez Jr. Nga wa hatagi og bisan gamay’ng kahigayonan nga makabungkag sa dinastiyang Radaza. Apan nipakugang sa tanang hingtungdan sa paglaslas pag-ayo sa mayoriya sa mga Radaza sa niaging piniliay.
Agresibo si Pelaez nga nipasaka og mga kasong pagpangawkaw batok sa mga Radaza. Apan way bisan usang nakadama sa Sandiganbayan. Dako ang pagduda ni Pelaez nga wa katabang sa iyang mga kaso si kanhi Ombudsman Merceditas Gutierrez, kinsa gipasanginlan nga niyaka sa mga kasong pagpangawkaw batok sa mga Radaza ug ubang mga alyado ni kanhi presidente Gloria Arroyo.
* * *
Di mabasol si Mayor Sitoy, kun tinuod nga nakahunahuna na pagbiya sa Cordova, nga madani sa mas dakong politikanhong ganti sa Opon. Kun magmalampuson, gawas nga makuha ang pagka mayor mahimong masakmit pag-apil sa iyang pundok ang pagka kongresista sa bugtong distrito sa Lapu-Lapu.
Si Sitoy may igong makinarya ug mas abundang kasinatian pagpukan sa mga Radaza. Kun magkasabot silang Pelaez, may igo nang politikanhong base nga kapasikaran og mas lig-ong kampanya. Apan kun nagtuo si Sitoy nga magpatara lang ang mga Radaza ug motahan sa nakagamot na nilang dinastiya, dako siyang sayop. Gani, labihang katungason sa iyang kawsa.
* * *
Lisod tuohan nga mokalit lang og katakilpo ang gamhanang makinarya sa mga Radaza kon manghagit na si Sitoy nila. Malampusong gitugpo ni kanhi mayor Boy Radaza ang iyang asawa nga mopuli niya pagka mayor ug ang iyang anak pagka kongresista.
Sibaw ang mga pasangil batok nila apan kutob ra sa bagulbol. Tungod sa nahiagoman nga kaapiki ni Pelaez ug sa iyang mga negosyo, may sukaranan ang ubang wa matagbaw nga mga Oponganon nga mahadlok kun tinud-on paggukod sa mga Radaza. Nga maoy labing dakong bentaha ni Sitoy. Nag-una siya sa duyan busa di mahitabong mahudlat sa mga Radaza. Taga Cordova bay gikinahanglan aron mapukaw ang talagsaong kaisog sa mga Oponganon nga dul-an sa 500 ka katuigan ang nilabay nakapukan sa mga langyaw nga nangahas pag-ulipon nila?
- Latest
