Pulos mabasol sa baha

Wala gyu’y madulot nga kaayuhan sa siyudad sa Sugbo ang tinulisukay ug pagpasapasa kinsay angay mabasol tali nilang Mayor Mike Rama ug kanhi mayor Tomas Osmeña nunot ning nagkagrabe nga suliran sa baha sa dakbayan.

Sulod sa dugay’ng panahon nga nahimong mayor si Tomas, wala gyud kini napatuman nga drainage masterplan sa dakbayan.

Ang pasangil ni Tomas nga ang drainage project wala mapatuman nga napupos iyang termino dili gyud katuohan. Sa wala pa ko mahimong peryodista, mayor na daan si Tomas sa dakbayan niadto pang 1980’s.

Nasulod na lang ko sa Banat News, mibalik si Tomas pagka-mayor sa dakbayan, apan wala gyuy drainage masterplan nga akong nadunggang gisugdan sulod sa iyang termino.

Napulo ka tuig ang nakalabay, ang dalan V. Gullas (karaang Manalili) paingon sa D. Jakosalem ug Colon, mobaha na gyud kini ilabi na kun grabe gyud kakusog ang ulan. Apan wala gyuy gihimo ang administrasyon ni Tomas niining problemaha.

Sayon kaayo ang pag-estorya og butbot, ilabi na kun ang estorya makadaot sa iyang kontra sa politika.

Sa samang bahin, nganong hangtod karon, si Mike wala usab makapatuman og drainage projects nga makasulbad sa suliran sa baha-baha sa siyudad bisan sa hinay’ng ulan-ulan?

Kun si Mike sa pagkakaron igo lang nangiyugpos ug nagbasol sa nasundan niyang administrasyon ni Tomas, maayo usab siyang paninumdoman nga sulod sa dugay’ng panahon nga nahimo siyang bise mayor sa dakbayan ug angay siyang pangutan-on unsay iyang nabuhat pagsulbad sa suliran sa baha sa dakbayan.

Kagahapon, si Konsehal Margot Osmeña mipasangil sa pagkahaguka ni Mike tungod sa kapakyas niini pagpalit og “multi-purpose walking excavator” nga maoy mokubkob sa nagkamabaw nga kasapaan sa dakbayan. Nakita unta kining makatabang sa pagsulbad sa baha, wala mogimok si Mike bisan ang budget niini nga P20.5 milyones naaprobahan na sa Konseho. Adunay P500 milyones alang sa anti-flood projects sa siyudad sa Sugbo nga giaprobahan usab sa Konseho.

Hain man kining mga pundoha?

Ang akong gikahibudngan, si Mike ug ang mga konsehal sa dakbayan wala masayod nganong wala mapalit ang walking excavator. Ambot og unsa nga anti-flood project nga napatuman sa administrasyon ni Mike gikan nianang P500 milyones.

Aduna man diay kitay pundo alang sa mga proyekto kontra baha, apan nganong hangtod karon, ang pagsemento ra man sa karsada ang nabuhat ni Mike. Nagsige og semento sa karsada unya wala atimana ang drainage.

Mentras tantong dili pa ingon kagrabe sa Manila ang suliran sa baha sa dakbayan, sakto na una ang tinulisukay ug binasolay. Molihok na lang una kita aron mapangitaan og solusyon kining problema sa baha sa atong mahal nga dakbayan.