Ang sekreto sa paglampos

Sa kinabuhi kun aduna kitay buot kab-uton, simple ra kaayo ang sekreto niini aron mulampos. Kini mao ang – unsa gani ang anaa sa hunahuna unya atong ipamulong, ato usab dayon nga buhaton. Ihan-ay nga tutokan pag-ayo ang mga detalye sumala sa prayoridad hangtud matibuok ang butang nga atong gitinguha. Makaseguro ka nga madasig sa pagpadayong mabuhat kini.

Diha kadtoy panultihon sa usa ka politiko nga nagkanayon, “ Pabuhata ang pulong. Dili kay ang pulong maoy pasultihon.”Husto baya kini, kay kun igo lang kita sa sulti o sa pulong, unya wala buhata, nag-usik lang kitag panahon. Maugtas ka lang sa pagpinaabot, wala gyud kitay maani o makuhang kaayohan. Aniay pipila ka giya basin kini makatabang ;

*Maghimo’g resolusyon kanang igo lang nga ikaw makahimo gyud. Pilia ang gusto nimong resulta.

*Sud-onga ang kinabuhi mo, kun unsay labing mahinungdanon alang kanimo. May inisyatibo ka nga buhaton gyud nimo kini, dili kay ang uban mao pay mohingusog sa pag-ingon nga buhata kana.

*Pangitag kauban nga makatambag o makatabang nimo. Kay adunay tawo nga pareho nimo’g tumong nga muabag kanimo sa mga paagi.

*Kinahanglan positibo sa buhaton. Tamdi ang resolusyon mo, sa kadasig nga mulampos ka. Aron may kompyansa ka sa kaugalingon. Ayaw lantawa ang mga babag, magpursigido sa pagpadayon gyud bisag magkinaunsa man.

*Relaks lang nga mahimut-anon sa gibuhat ug pagsunod sa resolusyon. Kun di pa gani mosaler, pailubi nga mobuhat kana usab og lain.