Pagpahiyos sa kadaot
Nataligam-an tungod sa mas dakong kontrobersiya nga giatubang ni Bise Presidente Jejomar Binay ang laing bulilyaso ni Interior Secretary Mar Roxas: Wa pa ganing kagawas si Luis (ang bagyong gisundan ni Mario) sa Pilipinas, nideklarar na si Roxas og zero casualty. Nga kun tinuod tukma nga pasidungog sa takos niyang liderato pagduma sa mga katalagman.
Apan pila ka oras human sa deklarasyon ni Roxas, nipahibawo ang iyang giduma nga National Disaster Risk Reduction and Management Council (NDRRMC) nga namatyan diay og usa. Nga nitubo ngadto sa lima human sa pila ka gutlo. Apan gidalidali paglaslas ngadto sa tulo kay wa iapil ang mga nangamatay sa pagkalunod sa MV Maharlika Dos sa kadagatan sa Southern Leyte ug Surigao.
* * *
Masabot nga si Roxas naningkamot pagmatuod nga mas maayo siyang manalipod sa katawhan gikan sa katalagman kay sa gipintal sa iyang mga kaatbang nga siya ang simbolo sa kainutil sa nasudnong gobiyerno pagtubag sa mga panginahanglan sa mga biktima sa bangis nga bagyong Yolanda dinhi sa Kabisay-an.
Klarong gipaburot ra sa mga Romualdez, Marcos ug oposisyon ang kalangay, kakuwang ug kaguliyang sa relief operations ug sa nagpadayong rehabilitation. Di kasinahan ang lihok sa gobiyerno apan ang kadaghan sa mga biktima ug kalapad sa mga dapit nga naggusbat nakahimong imposible sa paghatag dayon sa tanang hinabang sa tanang biktima sa pasiunang mga oras ug mga adlaw human sa bagyo.
* * *
Apan way sukaranan si Roxas sa pagpaburot sa ilang kaandam sa bagyong Luis. Iresponsable ang pagpangangkon dayon og zero casualty bisan wa pa hingpit nga makalingkawas ang taga Luzon sa bagyo. Angay siyang magpasalamat nga mas nadapit ang pagtagad sa katawhan sa kapuliki ni Binay pagpanubag sa mga pasangil sa pangurakot batok sa iyang pamilya.
Angay sang mangayo og pasaylo ang NDRRMC sa gisalikway nilang mga biktima sa trahedya sa kadagatan. Makapangugat ba sila pagpangayo og mas dakong budget kun mailad ang publiko sa ilang pangugat nga di bagyo ang nakapalunod sa Maharlika Dos?
* * *
Kun gibasa pa lang unta sa NDRRMC ang gale warning sa Pagasa usa ka adlaw sa wa pa malunod ang barko, nga dagko ang bawod sa Kabisay-an kay nikusog sa habagat pag-abot ni Luis, di unta sila mangahas pagsugyot nga di angay’ng ipuno ang walo ka nangamatay ug mas daghan pang missing sa listahan sa mga biktima sa bagyo.
Strike 2 na ning NDRRMC. Sa special audit sa Commission on Audit (COA) sa pagtabang sa gobiyerno sa mga biktima sa bagyong Yolanda, nag-una sa listahan sa mga nagpabadlong ang NDRRMC ug Office of Civil Defense (OCD). Dako kaayo ang ilang quick response fund (QRF) apan wa silay bisan usa ka dako nga hinabang nga nahatag sa mga biktima.
* * *
- Latest
