Dili g’yud ta moabuso

Nalipay ko sa gipakita nga aksyon sa kadagkoan sa Department of Public Works and Highways (DPWH)-7 regional office kay gikontak g’yud ko sa ilang administrative officer kabahin sa gihimo sa ilang drayber.

Duna man gud ko’y gisuwat sa akong lindog nga sakyanan sa kagamhanan, brand new nga Mitsubishi Strada nga miabuso ang drayber pinaagi sa paglusot gihapon sa eskena bisan og stop na ang signal para kaniya.

Wala ko masayop nga ang nagmaneho sa mao nga sakyanan drayber lang ug dili mao ang giisyuhan sa government vehicle. Bisan og tinted gud ang bildo niini, napasihag nako ang bayhon sa drayber diha nga nagtupad ang among sakyanan.

Salamat kaayo kay giaksyonan sa mga opisyal sa DPWH ang akong gireklamo. Kuyaw man gud kadto nga magkadam-agay mi kay mikuliot man siya ug miilog sa akong agianan didto sa Salinas Drive ug Gorordo Avenue dapit sa JY.

* * *

Didto gihapon nga lugara, kaniadto’ng Lunes, dunay polis nga nagpabadlong. Ang polis nagsul-ob og uniporme ug diri pa siya sa akong kilid apan gusto nga mosulod sa gamay’ng lutsanan.

Nabasa nako ang iyang name plate nga AGDA. Kun wala ko masayop, apelyedo kadto sa mao nga polis. Mipahiyom ang polis sa dayon niya nga lusot sa gamay’ng agianan mao nga gipalusot na lang nako.

Ang akong nasawayan kaniya mao ang pagtaptap niya sa plate number sa iyang motor. Kun ang ubang motor gitaptapan og itom nga bildo ang ilang plate numbers, kadtong motor nga gimaneho ni Agda, itom g’yud nga plastik ang gitaptap.

Bisan og sigahon pa nimo ang imong mata wala kay makita nga plaka. Diha’y gamay nga buak dapit sa tunga sa plastik ug nakita nako ang puti nga mora’g kabahin sa plate number.

Ayaw tawon mo pag-abuso uy. Isip polis dili ka na lisensya sa pagpangabuso. Ang tukma nga buhaton sa polis, ilabi na og magsul-ob og uniporme, mopakita kamo sa katarong aron ang makakita modayeg kaninyo.

Dihang enforcer pa ko sa Land Transportation Office (LTO), panahon nga magsul-ob ko sa among uniporme, bisan kun motorsiklo lang ang akong gimaneho apan ang paggawas sa yellow solid line taliwala sa karsada akong gilikayan.

Gusto ko nga ang mga tawo nga makakita makasabot nga dili lisensya ang uniporme ug ang katungdanan sa paghimo’g mga abuso, hinuon ipakita nato ang pagka matinumanon sa balaod. Pinaagi niini, makuha nato ang respeto sa katawhan.