Bana nilugos sa asawa

Gibalhug sa selda sa Subangdaku Police Station sa dakbayan sa Mandaue ang usa ka bana human gireklamo og pagpanglugos sa iyang asawa.

Sa balaud sa Pilipinas puwede nga ikiha og pagpanglugos sa asawa ang iyang bana kun siya pugson sa pakighilawas ug gani aduna nay nasampolan niini didto sa Mindanao.

Busa mga bana ayaw mo pagpamugos sa pagpakighilawas sa inyong mga asawa kay basin og kamo na usab unya ang makatulog og prisohan.

Samtang obligasyon sa bana ug asawa ang pagpakighilawas isip magtiayon, wala gitugot kanila ang pagpamugos sa paghimo sa ingon kun dili gusto ang usa kanila tungod kay ang pagpamugos giisip nga pagpanglugos ug kriminal.

Lahi ang nahitabo sa magtiayon sa dakbayan sa Mandaue. Sa una misugot pa ang asawa sa kagustohan sa iyang bana apan sa kadugayan wala na kini makaagwanta tungod sa kahigal sa iyang bana.

Sigun sa balita, ang magtiayon aduna nay napulo ka anak ug ang asawa kanunay nga gikapoy tungod sa sayo niini’ng pagpanikaysikay aron makakaon ang pamilya.

Ang asawa mireklamo kay sa iyang paggikan paingon sa trabaho ug sa iyang pag-uli sa balay gikan nga naninda’g painit makighilawas kaniya ang iyang bana bisan nagmata pa ang ilang mga anak.

Sa kadaghang higayon, iyang gibalibaran ang bana apan gipugos siya niini. Tungod kay wala na makaagwanta iya na gayud nga gipasakaan og kaso’ng pagpanglugos ang iyang bana ug mao kini ang hinungdan sa pagkatingkagol niini sa prisohan.

Ang leksyon nga makuha nato ning maong estorya mao nga ayaw pagpamugos aron dili ka mapasakaan og kaso’ng pagpanglugos sa imong asawa.

Hangyo lang gud kun gusto ka, ug kun balibaran ka, bangon ug lakaw, dayon pagbarug-barog na lang sa dalan Colon basin na lang may matrona nga mokuha sa imong serbisyo.