EDITORYAL - Sari-sari store sa klase

“DepEd won’t sanction 5 teachers, principal.” Sumala pa sa report sa The Freeman. May kalambigitan kini sa reklamo sa magtiayon sa giingong pagpaninda sa mga matutudlo sud sa lawak-saringan.

Pipila ka mga maestra sa Carmen Elementary School ang gireklamo kay matud pa imbes nga magtudlo naninda na hinuon sila sud sa ilang mga klase ug gipautang pa ang mga estudyante.

Ang DepEd officials miklaro nang daan nga gidili sa revised guidelines ang pagpaninda sa mga magtutudlo diha sa sud sa ilang klase ug bisan na gani sa mga kantina sa eskuylahan.

Ang rason sa dili pa pagsilot kanila, kini tungod kay wala’y ikapuli sa pwesto nga ilang gihuptan karon. Paabuton na lang ang resulta sa reklamo sa magtiayon diha sa Ombudsman for the Visayas.

Ang nahitabo sa maong eskuylahan dili ikalimod nga nanghitabo usab sa ubang mga public schools sa rehiyon, gani duna pay mga magtutudlo nga pasagdan lang ang ilang mga estudyante paglinya sa flag ceremony kay atoa na-busy sa pagplastar sa ilang mga paninda sa kantina.

Dili maingon niini ang mga magtutudlo kung sakto pa ang ilang suholan sa panginahanglan nila ug sa ilang pamilya. Duna pay uban kanila naputos na og utang. Sibaw kaayo ang panawagan sa  mga grupo sa mga magtutudlo pagpangayo og dugang suholan.

Kataposang nakadawat og dugang suholan ang mga magtutudlo sa panahon pa ni kanhi presidente ug karon Kongresista Gloria Macapagal Arroyo. Kung ingon niini ang kinaiya karon sa mga magtutudlo nga maniguro lang sa ilang pagpaninda bisan nagdawat og suweldo, wala’y kalidad nga edukasyon ang makat-onan sa mga bata, ang makapabalaka, hasta pagpangutang gitudlo ngadto sa mga bata.