Sapa nahimong kanal Kanang

Kanang gamay na lang kaayo karon nga sapa nga milagbas sa dalan Sikatuna lumbay sa dalan Bonifacio, makita g’yud nimo kon giunsa sa mga tawo ang pagpagamay sa agianan sa tubig diha sa mao nga dapit.

Tupad nianang nagbaligya og mga puthaw, anaa mahimutang ang taytayan. Sa taliwala sa daplin sa taytayan, anaa makita ang tuig sa paghimo niini – 1920. Kon tan-awon pag-ayo karon ang taytayan, ang building nga pundohanan og mga puthaw, duol na sa tunga-tungang bahin sa taytayan.

Unsay buot ipasabot niini? Nagpasabot kini nga ang building nga pundohanan og puthaw apil na ang kabalayan sa unahan nga bahin mianam-anam sa pagsibog ngadto sa taliwala sa sapa ug nakapagamay sa agianan sa tubig.

Mao unta kini ang sapa nga agian sa tubig nga gikan sa Barangay Day-as apan kay gamay ug mabaw na man kaayo ang sapa, moawas na ang tubig ug mosuyla ngadto sa karsada. Kini maoy hinungdan nga kon adunay uwan, lawom kaayo ang tubig nga maglunop sa eskena Bonifacio ug Sikatuna.

Awhagon  nako ang Reduce Danger Zone on Rivers (Red-R) nga gipangulohan ni kanhi konsehal Jose Daluz III nga himoan nila kini og aksyon kay utro pa nga miabuso ang mga tag-iya niini nga building ug panimalay sa mao nga dapit.

Suwerte lang sila kay kon maglunop diha’ng dapita dili man sila maapeke tungod kay ang paglunop diha ra man sa ubos-ubos nga bahin sa ilang nahimutangan.

* * *

Ang abogado sa usa ka supermarket ug mall diha sa Colon miingon nga dili kuno angay’ng ilakip sa kampanya sa dakbayan paghawan sa three-meter easement ang ilang balay-patigayon nga ang kabahin anaa sa sapa kay natukod kuno kini kaniadto gatus ka tuig na ang nakalabay nga wala pa ang three-meter easement law.

Binuang nga argumento. Walay lalis nga ang ilang karaan nga building gitukod sa ilang mga apohan kaniadto pa, apan wala kini maglakip sa sapa. Angay’ng tinud-on gayud ni Mayor Michael Rama ang pagpatuman sa balaod.

Nasayod ko nga daghan g’yud nga mga magpapatigayon ang mountol sa estrikto nga pagpatuman sa balaod sa three-meter easement, apan sigurado usab ko nga sa pagpatuman niini daghang katawhan ang malipay.

Ang nahitabo gud mao nga gipagamay man nila ang agianan sa tubig pinaagi sa pagtukod og riprap sa unahan pa sa tampi sa sapa kaniadto. Isig ka daplin sa sapa gisibog mao nga ang sapa nahimo na lang kanal.